Laun æðstu ráðamanna Íslands hækka um 5,6 prósent um næstu mánaðamót, en launin eru uppfærð einu sinni á ári í samræmi við meðallaunahækkun ríkisstarfsmanna það árið.

Kemur fram á RÚV að þingfararkaup mun verða eftir hækkunina rúmar 1,6 milljónir króna á mánuði, hækkar um 85 þúsund krónur.

Þá verða laun ráðherra rúmar 2,6 milljónir króna. Laun forsætisráðherra verða um 2,9 milljónir króna á mánuði.

Laun forseta Íslands hækka og verða um 4,25 milljónir króna á mánuði - en dómarar við Hæstarétt fá rúmar 2,7 milljónir króna um næstu mánaðamót.

Laun forseta Íslands eru nú - eftir breytinguna - um 4,25 milljónir króna á mánuði. Hafa laun Höllu tekið fram úr launum Bandaríkjaforseta, á gengi dagsins í dag. Forseti Bandaríkjanna fær 400 þúsund Bandaríkjadali í árslaun, eða sem nemur 51 milljón króna á ári, sem gerir svipuð mánaðarlaun og forseti Íslands.

Einnig kemur það fram að sama hlutfallshækkun er í boði fyrir lögreglustjóra, saksóknara, ríkissáttasemjara, seðlabankastjóra og dómarar við aðra dómstóla. Laun hópanna hækka árlega í samræmi við launavísitölu ríkisstarfsmanna árið á undan.

Hagstofunni er falið að reikna hækkunina út, en samkvæmt upplýsingum frá stofnuninni hækkuðu launin um 5,6% á síðasta ári.