Hanna Katrín Friðriksson atvinnuvegaráðherra, Daði Már Kristófersson fjármála- og efnahagsráðherra og Trausti Hjálmarsson, formaður Bændasamtaka Íslands, hafa undirritað samkomulag um að framlengja gildandi búvörusamninga um eitt ár. Samningarnir, sem ná til garðyrkju, nautgriparæktar, sauðfjárræktar og almennra starfsskilyrða landbúnaðarins, munu því gilda til ársloka 2027 í stað þess að renna út í lok þessa árs.
Samkvæmt samkomulaginu verður fyrirkomulag samninganna að mestu óbreytt. Þó verður fallið frá áður fyrirhuguðum 1% niðurskurði á árlegum framlögum árið 2027. Það skapar svigrúm upp á tæpar 200 milljónir króna sem verður nýtt til að efla nýliðunarstuðning í landbúnaði og auka fjárfestingastuðning í nautgripa- og sauðfjárrækt.
Markmið framlengingarinnar er að skapa aukið svigrúm til undirbúnings og viðræðna um nýtt fyrirkomulag starfsskilyrða landbúnaðarins sem taka á gildi frá ársbyrjun 2028. Jafnframt var undirrituð sérstök viðræðuáætlun sem á að marka umgjörð um áframhaldandi vinnu við endurskoðun kerfisins.
