Framsóknarflokkurinn í Reykjavík beitir nokkuð nýstárlegum aðferðum í kosningabaráttunni en sveitastjórnarkosningar verða haldnar á Íslandi 16 maí næstkomandi.

Á fjögurra ára fresti hefst tímabil þar sem stjórnmálamenn verða meira áberandi en áður og auglýsingar og slagorð flæða út um allt og öllu fögru er lofað. Nú hefur Framsóknarflokkurinn stigið skrefi lengra en aðrir flokkar og er mættur á íslenska stefnumótaforritið Smitten.

Í stefnumótaforritinu er Framsókn sett inn sem persóna en fyrst sér notandi Smittens mynd af Einari Þorsteinssyni, oddvita Framsóknarflokksins í Reykjavík en á hinum myndunum má sjá frambjóðendur flokksins í næstu fjórum sætum. Er flokkurinn skráður sem 25 ára á Smitten, þó í raun sé hann 110 ára gamall. Samkvæmt skráningunni er Flokkurinn að leita að alvarlegu sambandi, er 210 cm á hæð, hefur verið í sambandi, er í ljónsmerkinu og langar í börn.

Ef prófíllinn er skoðaður nánar má til dæmis sjá að flokkurinn segist hafa gælunafnið Sveitaflokkurinn og að í augum Framsóknar kallast það grænt flagg „ef þú fýlar ábyrgan rekstur, að eyða biðlistum eftir leikskólaplássi með fjölbreyttum eða betri samgöngum.“

Skrítnasti maturinn samkvæmt flokknum er kjötsúpa með malti og í Fun Facts kaflanum skrifar hann „Eigum við ekki að skella okkur á stefnumót 16. maí?“

Þar sem notendur stefnumótaforritsins eiga að skrifa hvað það er sem þeir geta ekki staðist, skrifar Framsókn „Þegar þú segist ætla að kjósa Framsókn“ og bætir síðan við þekktu greddutjákni. Þá segist flokkurinn vera furðulega hrifinn af kjósendum.

Í hluta prófílsins þar sem spurt er um uppáhalds þægindaþáttinn skrifar Framsókn Love is blind, sem er afar vinsæll raunveruleikaþáttur meðal ungs fólks.

Hér fyrir neðan má sjá fleiri svör Framsóknarflokksins á stefnumótaforritinu.