Lögreglan á höfuðborgarsvæðinu hafði í nógu að snúast í gærkvöldi og í nóttu og sinnti fjölbreyttum verkefnum, meðal annars vegna fíkniefnamála, umferðarlagabrota og innbrota.
Tilkynnt var um þjófnað í verslun en málið var leyst á vettvangi með gerð vettvangsskýrslu.
Lögregla stöðvaði nokkra ökumenn grunaða um akstur undir áhrifum áfengis og vímuefna. Einn ökumaður var stöðvaður grunaður um ölvunarakstur og var látinn laus að lokinni sýnatöku. Þá voru þrír ökumenn stöðvaðir grunaðir um akstur undir áhrifum vímuefna, þar af einn sem einnig var með hníf meðferðis. Hnífurinn var haldlagður og ökumaðurinn kærður fyrir brot á vopnalögum. Annar ökumaður var án gildra ökuréttinda og sá þriðji var sviptur ökuréttindum. Allir voru látnir lausir eftir sýnatöku.
Tveir einstaklingar voru handteknir grunaðir um framleiðslu fíkniefna í heimahúsi. Við aðgerðina lagði lögregla einnig hald á þrjú skotvopn sem ekki voru geymd í læstri hirslu í samræmi við reglur um meðferð skotvopna.
Þá var lögreglu tilkynnt um innbrot í heimahús þar sem íbúar vöknuðu við að ókunnugur aðili væri að gramsa í geymslu þeirra. Gerandinn hljóp af vettvangi áður en lögregla kom á staðinn.
Tveir ökumenn voru einnig stöðvaðir fyrir of hraðan akstur en þeir mældust báðir á 115 kílómetra hraða á klukkustund þar sem hámarkshraði er 80 kílómetrar á klukkustund.
Loks var lögregla kölluð til vegna umferðaróhapps þar sem maður á reiðhjóli hafði fallið. Sjúkralið flutti manninn á slysadeild til frekari aðhlynningar.
