Gunnar Smári Egilsson, fyrrverandi leiðtogi Sósíalistaflokksins og núverandi ritstjóri Samstöðvarinnar, segist ekki vera að stofna nýjan stjórnmálaflokk en miklar deilur hafa ríkt í Sósíalistaflokknum undanfarna mánuði og var ný stjórn kjörin í maí.

Nýja stjórnin hefur kært þau Söru Stef Hildardóttur, starfandi gjaldkera Vorstjörnunnar, Védísi Guðjónsdóttur, formann Vorstjörnunnar, og Guðmund Auðunsson, gjaldkera kosningastjórnar flokksins, til lögreglu fyrir efnahagsbrot.

Stjórnin sendi félagsmönnum tölvupóst þar sem fyrrverandi stjórn var sökuð um að ætla tæma sjóði flokksins og reka flokkinn úr húsnæði hans en það er skráð á Vonarstjörnuna, sem er nátengdur Sósíalistaflokknum.

„Nei, en ég held að fólk sem hefur hrakist úr flokknum gæti gert það. Ég er ennþá í flokknum,“ sagði Gunnar Smári í samtali við Mannlíf um sögusagnir þess efnis að hann væri að fara stofna nýja flokk. Hann segist ekki vera hrifinn af nýrri forystu flokksins.

„Ég myndi ekki kalla þetta fólk sem er í stjórn flokksins, sem smalar inn á aðalfund til að láta kjósa sig í stjórn, forystu flokksins. Ég myndi segja að Sanna væri forysta Sósíalistaflokksins. Ég hef kallað þetta yfirtökulið en þau verða reið yfir því,“ hélt Gunnar Smári áfram. Þá telur hann nýja stjórn ekki endurspegla vilja almennra flokksmanna. „Fólk hugsar að það verði að finna einhverja aðra leið. Ég held að það séu fáir sem vilja vera í stuðningi við framboð Sósíalistaflokksins t.d. í Reykjavík með Sæþór Benjamín og Karl Héðinn í forystu.“

Hann vildi vera mjög skýr þess efnis að hann væri ekki að stofna nýjan flokk, eins og staðan væri í dag.

„Það er ekki verið að stofna nýjan flokk, en ég er ekki að segja að það verði ekki gert,“ sagði Gunnar Smári að lokum.