Ein þekktasta og jafnframt ein fallegasta kirkja landsins er Akureyrarkirkja; klárlega eitt af þekktustu kennileitum Akureyrar. Kirkjan var vígð í upphafi síðari heimsstyrjaldarinnar, árið 1940. Það var enginn annar en Guðjón Samúelsson, þáverandi húsameistari ríkisins, sem hannaði þessa gullfallegu kirkju. Verk húsameistarans Guðjóns má finna víða á Ísland, en hönnun Akureyrarkirkju er eitt af bestu og mestu listaverkum sem eftir hann liggja, og er þá mikið sagt.
Gluggi með sérstaka sögu
Kirkjan stendur á áberandi góðum og fallegum útsýnisstað, og eitt er víst að útsýnið yfir fallega bæinn Akureyri og nágrenni er eitthvað sem allir kunna að meta.
Það er skemmtilegt að heimsækja kirkjuna – ekki bara vegna útsýnisins – því það eitt og sér að skoða bygginguna sjálfa að utan og innan er nánast eins og að fara á glæsilega listasýningu; þar sem falleg hönnun fer saman við frábæra staðsetningu, og þá er umhverfið í kringum kirkjuna afar fallegt og gleður og endurnærir líkama og sál.
Það má geta þess að í Akureyrarkirkju er meðal annars að finna mjög sérstakan glugga; lengi vel var talið að hann hefði upphaflega verið í dómkirkjunni í Coventry í Englandi. Seinni tíma rannsóknir hafa þó leitt í ljós að það sé líklegra að glugginn sérstaki sé úr kirkju í höfuðborg Englands – en það breytir litlu varðandi þennan glugga sem gaman er að skoða gaumgæfilega.
Einstök listaverk
Og það hafa fleiri listamenn en Guðjón Samúelsson komið að því vel heppnaða listaverki sem Akureyrarkirkja óneitanlega er að utan og innan.
Til dæmis má sjá á svölum kirkjuskipsins lágmyndir eftir Ásmund Sveinsson – sem var einn af frumkvöðlum íslenskrar höggmyndalistar; var listamaður á heimsmælikvarða.
Þriðji listamaðurinn sem nefndur er hér í tengslum við Akureyrarkirkju er Bertel Thorvaldsen – sem var dansk-íslenskur myndhöggvari – en skírnarfontur kirkjunnar er gerður eftir fyrirmynd hans.
Það eru margar fallegar kirkjur á Íslandi öllu sem gaman er að skoða og það á svo sannarlega við um Akureyrarkirkju; kirkjan er ekki bara eitt af kennileitum Akureyrar og Íslands alls, heldur einfaldlega ein fallegasta, tignarlegasta og glæsilegasta kirkja landsins, og er í raun og veru eitt stórt listaverk sem svo sannarlega er þess virði að skoða, upplifa og njóta.
Akureyrarkirkja er opin sem hér segir: 2. júní – 28. Ágúst frá klukkan 10-16.
Þó skal bent á að kirkjan er nánast undantekningarlaust lokuð þegar athafnir fara fram í henni eins og skiljanlegt er; skal athygli vakin á því að kirkjan er lokuð þegar útfarir eða aðrar athafnir fara fram og er það að sjálfsögðu auglýst sérstaklega á kirkjudyrunum.
Fyrir áhugasama er hægt að nálgast frekari upplýsingar á heimasíðu kirkjunnar akureyrarkirkja.is, Hægt er að hafa samband í síma 462-7700 eða á netfangið [email protected].
Og ekki má gleyma „Eyjakirkjunum“ svokölluðu; Grímseyjarkirkju og Hríseyjarkirkju, en allar þessar kirkjur eru svo sannarlega þess verðar að skoða í krók og kima ásamt stóra áðurnefnda bróður – Akureyrarkirkju.
