Nýr meirihluti í Reykjavíkurborg, undir stjórn Hildar Björnsdóttur, hefur ákveðið að leggja niður skrifstofu samskipta og viðburða sem hluta af hagræðingaraðgerðum og skipulagsbreytingum innan borgarkerfisins. Samhliða breytingunum hefur um það bil tíu starfsmönnum verið sagt upp störfum.

Heimildin greindi frá málinu.

Fram kemur að uppsagnirnar nái eingöngu til upplýsingafulltrúa en viðburðahluti skrifstofunnar verði fluttur undir aðra starfseiningu. Borgin hyggst jafnframt ekki óska eftir vinnuframlagi þeirra starfsmanna sem sagt hefur verið upp frá og með næstu mánaðamótum.

Samkvæmt Heimildinni fengu starfsmenn tölvupóst í morgun þar sem þeir voru boðaðir til einstakra funda með Þorsteini Gunnarssyni borgarritara. Þar voru þeim tilkynntar uppsagnirnar.