Húsnæðis- og mannvirkjastofnun (HMS) hefur varað neytendur við föndursetti sem selt hefur verið hér á landi eftir að í ljós kom að sandurinn í því gæti verið mengaður af asbesti.

Um er að ræða Galt Sand Stickers Craft Kit, föndursett sem inniheldur sex dýralímmiða og fjóra poka af lituðum sandi. Samkvæmt HMS getur varan verið heilsuspillandi þar sem sandurinn gæti innihaldið asbest, sem er bannað efni og getur valdið heilsutjóni jafnvel við litla útsetningu.

Settið hefur verið selt í A4 hér á landi. Alls voru 90 eintök seld á tímabilinu frá árinu 2023 til apríl 2026.

HMS hvetur alla sem eiga vöruna til að taka hana tafarlaust úr notkun og annað hvort farga henni eða skila til söluaðila. Sé sandurinn enn í upprunalegum umbúðum á að setja hann í plastpoka, loka pokanum vel með límbandi og farga vörunni með öruggum hætti.

Þá er fólki ráðlagt að þrífa svæði þar sem sandurinn hefur verið notaður með blautum klút til að koma í veg fyrir rykmyndun. Við þrifin skal nota hanska og andlitsgrímu.

Neytendur geta haft samband við A4 til að skila vörunni eða fá frekari upplýsingar.