Írskir lögreglumenn koma til Íslands í næstu viku í tengslum við rannsókn þeirra á hvarfi Jóns Þrastar Jónssonar, en síðast er vitað um ferðir hans í Dyflinni á Írlandi í febrúar 2019 en lögreglan greinir frá þessu í tilkynningu.

Fyrir liggur samþykkt réttarbeiðni og til stendur að taka skýrslur af um 35 manns vegna málsins og mun Lögreglan á höfuðborgarsvæðinu veita liðsinni vegna þessa. Tekið skal fram að fyrirhugaðar skýrslutökur eru á forræði og undir stjórn íslensku lögreglunnar.

Við rannsókn málsins hefur verið kallað eftir upplýsingum frá almenningi og ítrekar lögreglan þá beiðni en þeim má koma á framfæri í tölvupósti á netfangið [email protected]