Fjölskylda Jóns Þrastar Jónssonar telur ekki óhugsandi að hann hafi verið myrtur af leigumorðingja í Dublin á Írlandi fyrir mistök.
Í umfjöllun The Irish Times segir að lögreglumenn frá Írlandi séu væntanlegir til Íslands í tengslum við rannsóknina á hvarfi Jóns Þrastar en síðast er vitað um ferðir hans í Dublin í febrúar fyrir sex árum.
Í tilkynningu frá íslensku lögreglunni kemur fram að samþykkt réttarbeiðni liggi fyrir. Til standi að taka skýrslur af tæplega fjörutíu manns vegna málsins.
Eins og margoft hefur komið fram þá hvarf Jón Þröstur sporlaust í heimsókn sinni til Dublin, en þangað fór hann til að taka þátt í pókermóti.
Ljóst er að írska lögreglan hefur sett þunga í rannsóknina og hafa meðal annars verið framkvæmdar fjórar leitir í Dublin á undanförnum mánuðum með aðstoð sporhunda.
Í umfjöllun The Irish Times er sagt að írska lögreglan telji að hér á landi sé að finna fólk er kunni að hafa vitneskju um hvarf Jóns Þrastar, en vilji mögulega eigi ræða við lögregluna á Íslandi og vonast írska lögreglan til að fólkið sé tilbúið að ræða við írska lögreglumenn.
Írskir sem og íslenskir lögreglumenn hittust nýverið í í Haag í Hollandi. Mótuðu þá stefnu er varðar aukinn þunga í rannsóknina.
Jón Þröstur fór fótgangandi frá hótelinu er hann dvaldi á; náðust myndir af honum í öryggismyndavél nálægt inngangi hjúkrunarheimilis við hlið hótelsins.
Hefur írska lögreglan ekki frekari upplýsingar um afdrif hans og þá hafa engin ummerki um hann fundist í langan tíma.
Jón Þröstur hafði aldrei áður komið til Írlands; átti þar enga vini eða fjölskyldu, að því er fram kemur í umfjöllun The Irish Times.
