Leikarinn og grínistinn Karl Ágúst Úlfsson gerir aðildarumræðu Íslands að Evrópusambandinu að skotspæni í kaldhæðinni Facebook-færslu þar sem hann birtir gervigreindarmynd af Alþingishúsinu sem hefur verið „málað í fánalitunum“. Með því blandar hann fánamálinu hjá Grafarvogskirkju, inn í ádeilu sína.

Í færslunni segir Karl Ágúst að það hafi lengi farið í taugarnar á „sönnum Íslendingum“ að Alþingishúsið hafi verið hannað af dönskum arkitekt og reist af dönskum byggingameistara.

„Jæja, þá er loksins búið að mála Alþingishúsið í fánalitunum. Mikið var. Það hefur farið í taugarnar á sönnum Íslendingum frá upphafi að það skyldi upprunalega vera hannað af dönskum arkítekt. Og til þess að auka enn á skömmina var ráðinn danskur byggingameistari í djobbið.“

Bætir hann við: „Hvað kom út úr því? Jú, kumbaldi sem er svo danskur í útliti að það hálfa væri nóg,“ skrifar hann.

Hann heldur síðan kaldhæðninni áfram og segir að það skýri hvers vegna stjórnmálamenn sem starfi í húsinu verði smám saman „óheyrilega danskir í hugsun“.

Karl Ágúst vísar þar til ákvörðunar um að efna til þjóðaratkvæðagreiðslu um hvort hefja eigi aðildarviðræður við Evrópusambandið.

„Nýjasta dæmið er ákvörðunin sem þar var tekin um að spyrja þjóðina – ÍSLENSKU ÞJÓÐINA – hvort ekki sé í lagi að koma sér innundir hjá Dönum og fjölþjóðlegum kumpánum þeirra upp á nýtt,“ skrifar hann og bætir við, einnig í gamansömum tón, að slíkt gæti kallað yfir Íslendinga „nýja danska einokunarverslun og fjórtán tvö í enn einum fótboltaleiknum.“

Í lok færslunnar segir Karl Ágúst að þessi hugmynd hefði aldrei komið fram ef í stað Alþingishússins hefði verið reistur „reisulegur íslenskur þingburstabær við Austurvöll“.