Kristrún Frostadóttir segir að niðurstöður sveitarstjórnarkosninganna hafi verið bæði ánægjulegar og um leið tilefni til sjálfsskoðunar hjá Samfylkingunni. Þetta kemur fram í pistli sem hún birti á Facebook í kjölfar kosningann um helgina
Í pistlinum þakkar forsætisráðherrann kjósendum, frambjóðendum og sjálfboðaliðum fyrir þátttöku í lýðræðinu og segir hvert einasta atkvæði skipta máli.
„Ég er þakklát fyrir lýðræðið okkar,“ skrifar Kristrún.
Hún bendir á að Samfylkingin hafi fengið næstmest fylgi á landsvísu og fjölgað sveitarstjórnarfulltrúum sínum um helming. Nú sitji 38 fulltrúar fyrir flokkinn í sveitarstjórnum víðs vegar um landið, sem sé næstmesti fjöldi S-listafulltrúa frá stofnun flokksins.
Kristrún segir sérstaklega ánægjulegt að sjá aukinn stuðning við flokkinn á landsbyggðinni þar sem jafnaðarmenn séu að styrkja stöðu sína á ný. Hún viðurkennir þó að flokkurinn hafi sett sér hærri markmið og að ljóst sé að hluti kjósenda með „jafnaðartaug“ hafi kosið aðra flokka að þessu sinni.
Forsætisráðherrann segir það vera á sinni ábyrgð að leiða uppbyggingu flokksins áfram og vinna að því að endurheimta traust kjósenda, sérstaklega í borgarmálum. Hún nefnir að þrátt fyrir að Samfylkingin hafi haldið fimm borgarfulltrúum sínum í Reykjavík þurfi flokkurinn að byggja upp traust að nýju.
Þá segir Kristrún að ríkisstjórnin muni halda áfram umbótum í ríkisfjármálum, samgöngum, heilbrigðiskerfi og húsnæðismálum. Að lokum greinir hún frá því að hún haldi nú til Noregs þar sem hún muni meðal annars funda með forsætisráðherra Indlands og fulltrúum atvinnulífsins á Íslandi.
