Athugasemdakerfi mbl.is á Facebook logar í rasískum ummælum eftir að miðillinn birti myndskeið þar sem hópur ungra manna ræðst á eldri mann í miðborg Reykjavíkur. Vilja margir senda mennina úr landi en þeir eru allir íslenskir.

Lögreglan rannsakar hópárás sem átti sér stað í miðborg Reykjavík í gærmorgun þar sem nokkrir ungir menn réðust á eldri mann.

Samkvæmt upplýsingum frá Unnar Már Ástþórsson, aðalvarðstjóra hjá lögreglunni, eru þrír menn grunaðir um aðild að málinu. Þeir voru handteknir og yfirheyrðir en síðar sleppt úr haldi. Allir eru þeir með íslenskt ríkisfang.

Brotaþolinn, sem einnig er íslenskur, hlaut áverka í árásinni en hefur nú verið útskrifaður af sjúkrahúsi.

Myndband sem gengið hefur manna á milli á samfélagsmiðlum sýnir hluta atviksins. Þar má sjá orðaskipti milli hópsins og eldri mannsins á Lækjargata áður en ástandið magnast upp.

Samkvæmt upptökunni kastaði maðurinn flösku í átt að hópnum, en í kjölfarið réðust mennirnir að honum. Þar sést meðal annars hvernig þeir slá hann í höfuðið og sparka í hann eftir að hann fellur til jarðar, meðal annars utan í kyrrstæðan leigubíl á götunni.

Heyra má nokkuð greinilega í myndskeiðinu að mennirnir tala allir íslensku en einn þeirra kallar eldri manninn „jólasvein“.

Athugasemdakerfi Morgunblaðsins á Facebook fylltist fljótt af rasískum athugasemdum sem flestar miðuðu að því að reka ætti árásarmennina úr landi.

Hér má sjá nokkur dæmi um athugasemdir við frétt mbl.is:

„Allir væntanlega kærðir fyrir stórfelda líkamsárás og hent síðan úr landi.“

„Afhverju er þessum ræflum leyft að vera í okkar landi?“

„Þetta er nú meiru ljótu anskotans aumingjarnir burtu með þetta lið strax.“

„Þetta á bara eftir að versna… Fljótum sofandi að feigðarósi. Íslam virkar ekki i vestrænum þjóðfelögum.“

„Mér sýnist þetta vera útlendingar sem eru að berja manninn.“

„Þetta er einfaldega þeirra eðli.“

„Vil fólk halda þessum skríl hérna ...fólk er alls staðar í hættu eitt á ferð.“

Þó rasískar athugasemdir séu ráðandi við fréttina má þó sjá nokkra benda fólki á að um sé að ræða íslenska ofbeldismenn. Ásta nokkur skrifar til dæmis: „Vá hvað það er ljótt að lesa kommentin hérna! Strákarnir eru að tala ÍSLENSKU. Fordómarnir skína hérna í gegn alveg hreint!“

Þó hér sé fjallað um athugasemdakerfi Morgunblaðsins einskorðast svipaðar athugasemdir ekki við þann miðil.

Hér fyrir neðan má sjá hið umtala myndband en viðkvæmir eru varaðir við.