Þýska knattspyrnufélagið Mainz hefur tapað áfrýjunarmáli fyrir dómstólum vegna ólögmætrar uppsagnar hollenska kantmannsins Anwar El Ghazi.

Félagið sagði El Ghazi upp í nóvember 2023 eftir að hann birti röð færslna á samfélagsmiðlum um átökin milli Ísraels og Gaza.

Í júlí 2024 komst þýskur dómstóll að þeirri niðurstöðu að uppsögnin hefði verið ólögmæt og að ummæli leikmannsins féllu undir vernd tjáningarfrelsis.

Mainz áfrýjaði dómnum, en vinnumáladómstóll ríkisins Rheinland-Pfalz staðfesti hina upphaflegu niðurstöðu í gær.

„Við verðum að sætta okkur við niðurstöðu dómsins,“ sagði Stefan Hofmann, stjórnarformaður félagsins.

„Hins vegar stöndum við við okkar afstöðu: Í samræmi við þau gildi og sannfæringar sem skilgreina Mainz 05 er áframhaldandi starf einstaklinga sem tjá sig eða hegða sér í andstöðu við þessi gildi, ekki mögulegt.“

El Ghazi var upphaflega settur í leikbann af Mainz 17. október eftir að hann birti færslu á samfélagsmiðlum sem innihélt setninguna: „from the river to the sea“, slagorð sem sumir telja fela í sér stuðning við eyðingu Ísraelsríkis.

Þeir sem styðja Palestínu andmæla þeirri túlkun og segja flest fólk sem notar slagorðið vera að kalla eftir lokum hernámsins á Vesturbakkanum og afléttingu einangrunar Gaza-svæðisins, en ekki eyðingu Ísraels.

Mainz sagði í yfirlýsingu að færsla leikmannsins „tæki afstöðu til átaka í Miðausturlöndum á hátt sem væri óásættanlegur fyrir félagið“.

El Ghazi, sem er fyrrverandi leikmaður Ajax, Lille, Aston Villa, PSV og Everton, sneri aftur til liðsins þremur dögum síðar og sagðist „standa fyrir frið umfram allt“.

Skömmu síðar greindi hann þó frá því að hann hefði ekki heimilað yfirlýsingu félagsins um endurkomuna og sagði Mainz því upp samningi „vegna ummæla og færslna leikmannsins á samfélagsmiðlum“.

Eftir að hafa unnið málið fyrir dómi í fyrra ákvað El Ghazi að gefa 500.000 evrur (um 73,5 milljónir króna) af uppgjöri sínu frá félaginu til verkefna sem styðja börn á Gaza sem orðið hafa fyrir áhrifum af átökunum.

„Ég vona að Mainz, þrátt fyrir endurteknar tilraunir sínar til að forðast greiðsluna, finni huggun í því að þau hafi, í gegnum mig, lagt fjárhagslegt framlag til þess að gera líf barna á Gaza aðeins bærilegra,“ sagði El Ghazi í júlí 2024.

El Ghazi, sem er þrítugur, gekk í raðir Cardiff City eftir að hann yfirgaf Mainz, en leikur nú með Al-Sailiya í Katar.