Eigandi svokallaðs McQueen Camaro-bíls hefur stigið fram og vísað á bug ásökunum um aðild að líkamsárás sem átti sér stað á Akureyri fyrr í júní í tengslum við Bíladaga.

Litlar opinberar upplýsingar liggja fyrir um meinta árás en að sögn óstaðfestra frásagna á Facebook réðst hópur á mönnum á 17 ára dreng af fyrra bragði. Aðrir segja að drengurinn hafi, ásamt vinahópi sínum, gengið í strokk á öðrum manni og aðrir komið þeim manni til hjálpar.

Í færslu sem hann birti á Facebook segist Ahmed Khalidsson hafa orðið fyrir miklu hatri og ásökunum á samfélagsmiðlum undanfarna daga vegna þess að bíll hans hafi sést á svæðinu þegar atvikið átti sér stað.

Ahmed segir að hann hafi eingöngu mætt á Bíladaga til að taka þátt í bílasýningu og njóta viðburðarins ásamt öðrum bílaáhugamönnum. Hann hafi lagt mikla vinnu í að undirbúa bíl sinn fyrir hátíðina og hafnar því alfarið að hafa komið að slagsmálum eða öðru óláta.

Samkvæmt frásögn hans var hann inni á veitingastað og að borða þegar umrætt atvik átti sér stað. Þótt bíll hans hafi verið lagður fyrir utan segir hann það ekki vera sönnun þess að hann hafi átt nokkra aðild að málinu.

„Ég er ekki manneskja sem sækist eftir slagsmálum, átökum eða vandræðum,“ skrifar Ahmed og segist miður sín yfir því að fólk dragi ályktanir og dreifi ásökunum án þess að fyrir liggi staðreyndir eða sannanir.

Hann vísar einnig á bug ummælum sem hafi birst á samfélagsmiðlum þess efnis að hann hafi sérmerkt bíl sinn til að vekja athygli ungs fólks. Slíkar fullyrðingar eigi sér enga stoð í raunveruleikanum og séu dæmi um ósanngjarna umfjöllun og fordóma.

Ahmed segist einungis vilja koma sannleikanum á framfæri og hreinsa nafn sitt. Hann skorar jafnframt á þá sem haldi öðru fram að leggja fram raunverulegar sannanir fyrir fullyrðingum sínum.

Að lokum hvetur hann fólk til að sýna ábyrgð í umræðu á samfélagsmiðlum og forðast að dreifa ósönnum sögusögnum.

„Orð geta haft miklar afleiðingar, sérstaklega þegar þau byggja ekki á staðreyndum,“ segir hann í færslunni.