Karlmaður hefur verið dæmdur í fangelsi fyrir að aka á gangandi vegfaranda í Hafnarfirði.
Maðurinn var ákærður fyrir líkamsmeiðingar af gáleysi og umferðarlagabrot með því að hafa þriðjudaginn 5. ágúst 2025 ekið bifreið gegn rauðu umferðarljósi vestur um gatnamót Reykjanesbrautar við Hamraberg í Hafnarfirði með þeim afleiðingum að hann ók á gangandi vegfaranda sem gekk suður yfir gatnamótin á grænu gönguljósi.
Við áreksturinn hlaut vegfarandinn alvarlega og lífshættulega áverka, þar með talið áverkainnanbastsblæðingu, áverkainnanskúmsblæðingu, mar og yfirborðsáverka á höfði, mar á hægra og vinstra lunga, rifna lifur sem blæddi inn í kviðarhol, sár á mjöðm, opið sár á úlnlið og hendi, brot á þverhryggjartindum á fyrsta og öðrum lendarlið, brot á sköflungsbol og sár á hné.
Ökumaðurinn játaði brot sitt skýlaust. „Á hinn bóginn verður ekki horft framhjá því að með akstri bifreiðarinnar […] greint sinn sýndi ákærði af sér stórfellt gáleysi og olli brotaþola stórfelldu líkamstjóni. Sér enn ekki fyrir endann á hverjar afleiðingar verða fyrir heilsu og framtíð brotaþola,“ segir meðal annars í dómnum.
Hann var dæmdur í eins mánaðar skilorðsbundið fangelsi en dómurinn er skilorðsbundinn til tveggja ára. Þá þarf hann að greiða fórnarlambi sínu 2.500.000 krónur með vöxtum.
