Það kemur fram í skýrslu Rannsóknarnefndar samgönguslysa að ökumaður er lést í bifhjólaslysi á Heiðmerkurvegi þann 7. mars í fyrra hafði ekki ökuréttindi og þá hafði skráningarnúmer bifhjólsins verið lagt inn hjá skoðunarstofu.
Í sömu skýrslu kemur fram í að hiti var um 6 gráður. Var hægviðri og skýjað er slysið varð en bundið slitlag er á veginum og var hann rakur.
Ökumaðurinn ók Sherco-bifhjóli á Heiðmerkurvegi á beinum vegkafla sem er um 2,3 kílómetra frá gatnamótum við Elliðavatnsveg er hann missti stjórn á bifhjólinu.
Maðurinn, sem var nítján ára gamall, kastaðist af hjólinu og lét lífið af völdum fjöláverka.
Kemur fram að ekki hafi verið hægt að sjá vísbendingar um hraða bifhjólsins er slysið varð. Að sögn samferðarmanns var hjólinu ekið á um það bil 40 til 50 kílómetra hraða á klukkustund.
Var ökumaðurinn skráður eigandi bifhjólsins, en hann hafði þó ekki ökuréttindi til þess að aka því eins og áður hefur komið fram.
Ekkert benti til þess að ökumaðurinn hefði verið undir áhrifum áfengis eða fíkniefna og ekkert athugavert hafi verið við klæðnað mannsins, hann var íklæddur viðurkenndum mótorhjólafatnaði.
Í skýrslunni er sagt frá því að bifhjólið hafi verið talsvert skemmt eftir slysið. Ekkert í niðurstöðum rannsóknarinnar benti til þess að rekja mætti orsakir slyssins til ástands bifhjólsins, en það var afskráð í september árið 2023.
