Ólafur Ragnar Grímsson, fyrrverandi forseti Íslands, gagnrýnir harðlega kosningaherferð þeirra sem hvetja landsmenn til að greiða atkvæði með í komandi þjóðaratkvæðagreiðslu. Beinir hann meðal annars spjótum sínum að leikaranum Pálma Gestssyni og segir herferðina vera orðna að „leikhúsfarsa“.

Ummæli Ólafs Ragnars komu í kjölfar færslu Sverris Helgasonar, stuðningsmanns Miðflokksins, á samfélagsmiðlinum X. Sverrir birti þar auglýsingu frá já-hliðinni og sagði:

„Ég er ansi hrifinn af þessari nýju kosningaherferð já-manna þar sem þeir fá alla helstu leikara landsins til þess að gera grín af því hversu heimskir allir sem kjósa nei eru.“

Ólafur Ragnar tók undir gagnrýnina og sagði þjóðaratkvæðagreiðslur vera æðsta form lýðræðis, þar sem vilji þjóðarinnar kæmi fram í gegnum heiðarlega umræðu og rökræður.

„Nú er já-hliðin að breyta þessu í leikhúsfarsa með því að ráða leikara til að flytja málstað sinn,“ skrifaði Ólafur Ragnar.

Hann lét þar ekki staðar numið heldur sagði uppgjöf geta birst í ýmsum myndum. Já-hliðin hefði nú gefist upp á því að láta ráðherra og þingmenn flytja málstað sinn og þess í stað fengið leikara úr gamanþættinum Spaugstofunni til verksins.

Þar vísaði Ólafur Ragnar til Pálma Gestssonar, sem um árabil var einn af lykilmönnum Spaugstofunnar, og leikur í auglýsingunni. Sagði fyrrverandi forsetinn leikarann fenginn til að „endurtaka klisjur“ já-hliðarinnar.

Ummæli Ólafs Ragnars hafa vakið athygli á samfélagsmiðlum en hann hefur sjálfur tekið virkan þátt í umræðunni um þjóðaratkvæðagreiðsluna.

Pálmi svarar Ólafi á Facebook og segir einfaldlega: „Miklir menn erum við Hrólfur minn…. og búnir að gleyma íslenskunni…“