Olivia Ragnheiður Zieba hefur verið dæmd í þriggja mánaða skilorðsbundið fangelsi fyrir að hafa misnotað aðstöðu sína sem starfsmaður á hjúkrunar- og dvalarheimilinu Barmahlíð á Reykhólum og tekið rúmlega 1,2 milljónir króna af bankareikningi vistmanns heimilisins.

Samkvæmt ákæru hafði Olivia þegið debetkort vistmannsins og nýtt sér að hann væri með vitræna skerðingu og ekki fær um að átta sig á eigin fjármálum. Þá var einnig litið til þess að hann hefði verið háður þjónustu hennar á hjúkrunarheimilinu.

Olivia notaði debetkortið í eigin þágu í alls 48 skipti á tímabilinu frá 7. júní til 25. júlí árið 2023. Um var að ræða bæði úttektir úr hraðbanka og greiðslur fyrir vörur og þjónustu. Heildarfjárhæðin nam 1.231.766 krónum.

Dómurinn taldi játningu ákærðu, ásamt gögnum málsins, sanna sekt hennar. Var henni gert að sæta þriggja mánaða fangelsi en fullnustu refsingarinnar frestað til tveggja ára gegn almennu skilorði.

Jafnframt var Olivia dæmd til að greiða brotaþolanum 1.199.766 krónur í skaðabætur auk vaxta og 350 þúsund krónur í málskostnað. Þá var henni gert að greiða tæplega 250 þúsund krónur í þóknun skipaðs verjanda síns.