Ahmed Jenin, Palestínumaður búsettur á Íslandi, kallar eftir auknu gagnsæi um fjármögnun nýrrar gyðingamenningarmiðstöðvar við Hverfisgötu í Reykjavík. Þetta kemur fram í Facebook-færslu þar sem hann segist ekki vera að efast um rétt fólks til að iðka trú sína heldur vilji fá svör um hvaðan fjármagnið komi og hvaða hagsmunir kunni að liggja þar að baki.

Í færslunni tengir Jenin opnun miðstöðvarinnar við stöðu mála á hernumdum palestínskum svæðum.

„Frá landnemabyggðunum á Vesturbakkanum og í Austur-Jerúsalem ... til nýrrar miðstöðvar í hjarta Íslands. Spurningin sem ég spyr sjálfan mig aftur og aftur er: Hver stendur á bak við þetta fé?“

Hann segir að á sama tíma og Palestínumenn búi við landnám, ofbeldi og brottrekstur af heimilum sínum sé ný miðstöð reist á Íslandi með stuðningi einstaklinga sem tengist stofnunum sem starfi á þessum svæðum.

Jenin tekur fram að hann sé ekki að gagnrýna trúariðkun.

„Ég er ekki að tala hér um rétt nokkurs manns til að iðka trú sína eða byggja bænahús. Það er réttur sem ber að virða. En ég hef spurningar um fjármuni, áhrif, ábyrgð og gagnsæi.“

Í færslunni nefnir hann hina nýju miðstöð, Beit Shvidler Jewish Center, sem ber nafn kaupsýslumannsins Eugene Shvidler, sem hann segir einn helsta stuðningsmann verkefnisins. Jenin heldur því fram að Shvidler hafi stutt ísraelsk samtök, þar á meðal Elad (Ir David Foundation), sem starfi í Austur-Jerúsalem.

Hann segir þau samtök hafa komið að landnemaverkefnum sem hafi leitt til þess að palestínskar fjölskyldur hafi verið hraktar af heimilum sínum og palestínskt land tekið undir nýjar landnemabyggðir.

Í lok færslunnar setur Jenin fram nokkrar spurningar sem hann telur mikilvægt að svara.

„Getur þessi fjármögnun í raun verið aðskilin frá þeim veruleika sem sum þeirra samtaka sem henni tengjast hjálpa til við að skapa? Á íslenskt samfélag aðeins að fá að vita nafn nýrrar byggingar, eða einnig bakgrunn þeirra sem fjármögnuðu hana? Er hægt að horfa fram hjá hernámi, landnemabyggðum og mannréttindabrotum þegar fjármunirnir berast undir merkjum trúar- eða menningarverkefna?“

Jenin hafnar jafnframt því að slíkar spurningar jafngildi gyðingahatri.

„Gagnsæi er ekki hatur á neinni trú eða samfélagshópi. Gagnsæi felur í sér að spyrja: Hver fjármagnaði? Hvað fjármagnaði hann? Og hvaða áhrif hefur það á líf annarra? ... Og áður en einhver dregur fram tilbúna ásökun um gyðingahatur ... þá virkar það spil ekki í þetta skiptið. Ég er einfaldlega að spyrja mjög einfaldra spurninga: Hver borgaði? Hvert fóru peningarnir? Og hvaða áhrif hafa þeir á líf annarra?“

Að lokum segir hann með léttum tón:

„Í stuttu máli ... ég er ekki að biðja um hernaðarleyndarmál. Ég er bara að spyrja: Hver borgaði fyrir kaffið?“