Pólskur ríkisborgari á þrítugsaldri hefur verið dæmdur í tíu mánaða fangelsi fyrir stórfellt fíkniefnalagabrot eftir að hafa flutt tæpan lítra af amfetamínbasa til landsins í febrúar síðastliðnum.

Maðurinn, Adrian Sebastian Wajs, játaði skýlaust sök við þingfestingu málsins og var það því dómtekið án frekari sönnunarfærslu. Samkvæmt ákæru flutti hann 970 millilítra af vökva sem innihélt amfetamínbasa með 40 til 41 prósents styrkleika til Íslands með flugi frá Osló þann 18. febrúar síðastliðinn. Tollverðir fundu efnin falin í áfengisflöskum í farangri hans við komu til landsins.

Fyrir dómi kom fram að fíkniefnin hefðu verið ætluð til söludreifingar hér á landi í ágóðaskyni. Við ákvörðun refsingar leit dómurinn meðal annars til þess að maðurinn hafði ekki áður gerst sekur um refsiverða háttsemi, að hann játaði brotið greiðlega og veitti lögreglu upplýsingar við rannsókn málsins.

Á hinn bóginn var litið til þess að um væri að ræða talsvert magn fíkniefna. Var refsing hans því ákveðin tíu mánaða fangelsi.

Þá voru fíkniefnin og ferðataska gerð upptæk og manninum gert að greiða tæpar tvær milljónir króna í sakarkostnað.