Einstaklega bjart og vel skipulagt einbýlishús við Eyktarhæð 5 í Hæðahverfi Garðabæjar hefur verið sett á sölu. Ásett verð eignarinnar er 199 milljónir króna.

Samkvæmt fasteignaskrá HMS er húsið skráð 263,5 fermetrar að stærð. Þar af er íbúðarhlutinn 228,8 fermetrar og bílskúrinn 34,7 fermetrar. Húsið var byggt árið 1993 en fullklárað árið 1996. Það var teiknað af Hauki Viktorssyni.

Eignin stendur hátt og innst í botnlanga í rólegu og fjölskylduvænu hverfi. Frá húsinu er víðáttumikið útsýni yfir Akrahverfið, Arnarnesvog og í átt að Snæfellsjökli. Lóðin er gróin og skjólsæl sem skapar notalegt umhverfi.

Húsið er hannað á pöllum og skiptist að hluta til á tvær hæðir með millihæð sem skapar gott flæði á milli rýma. Skipulagið gerir jafnframt ráð fyrir að svefnherbergisálman sé nokkuð afskekkt frá sameiginlegum rýmum heimilisins.

Í húsinu eru fimm herbergi, rúmgott eldhús, borðstofa, setustofa og sjónvarpsstofa. Þá eru tvö baðherbergi í eigninni auk gestasnyrtingar.