Þegar nýr meirihluti Sjálfstæðisflokksins, Viðreisnar og Framsóknarflokksins tók við stjórn í Reykjavík var vefsíðan verkefnalisti.is opnuð. Þar get borgarbúar fylgst með framvindu þeirra verkefna sem sett hafa verið fram í meirihlutasáttmála flokkanna.
Á vefsíðunni eru stefnumál meirihlutans útfærð og tímasett með það að markmiði að auka gagnsæi í stjórnsýslu borgarinnar og gera íbúum kleift að fylgjast með hvernig framkvæmd loforða og verkefna miðar áfram.
Verkefnunum er skipt í átta málaflokka: æskuárin, samgöngur, húsnæði, atvinnulíf og menningu, hreyfingu og útivist, efri árin, velferð og rekstur og umhirðu.
Meðal verkefna sem birt eru á listanum eru áform um að semja við einkaaðila um uppbyggingu hagkvæms húsnæðis fyrir leikskóla og dagheimili, endurskoðun deiliskipulags við Suðurlandsbraut og afnám reglna um hámarksfjölda bílastæða við nýbyggingar. Þá er einnig stefnt að lækkun fasteignaskatta á atvinnuhúsnæði, auknu aðgengi almennings að íþrótta- og skólahúsnæði borgarinnar og sérstöku átaki til að efla tæknifærni eldra fólks.
Öll verkefni á listanum eru merkt með skýrum tímaramma. Sum þeirra eiga að ná fram að ganga innan fyrstu 100 daga kjörtímabilsins, önnur innan 12 mánaða og enn önnur á fjögurra ára tímabili.
Öldungar og íslenski fáninn
Athygli vekur að nú þegar er búið að merkja „Lokið“ við tvö verkefni. Annars vegar við „Við ætlum að endurvekja öldungaráð borgarinnar og efla samstarf við hagsmunasamtök eldra fólks“ og hins vegar við „Við ætlum að draga íslenska fánann að húni daglega við Ráðhús Reykjavíkur.“
Nýr meirihluti er vissulega búinn að endurvekja öldungaráð borgarinnar og eru það Albert Guðmundsson og Björn Gíslason frá Sjálfstæðisflokknum og Steinunn Gyðju- og Guðjónsdóttir frá Samfylkingunni sem sitja í því ráði.
Eðli málsins samkvæmt hefur meirihlutinn þó ekki staðið við loforðið um fánamálið enda er kjörtímabilið nýhafið og ómögulegt að segja hvort íslenski fáninn verði dreginn að húni alla daga og getur margt spilað inn í, eins og t.d. veður og frí starfsmanna. Er því ranglega merkt að því máli sé lokið.
Mannlíf sendi fyrirspurn á alla oddvita meirihlutans um málið en fékk ekki nein svör.
