Rannsókn er lokið á máli leigubílstjóra sem réðst á annan mann þann 12. maí í Garðabænum en það staðfesti Ásdís Haralds Johnsen lögreglufulltrúi í samtali við Mannlíf.

Vitni, sem Mannlíf ræddi við, segja mennina tvo hafa verið að ræða saman á bílastæði þegar leigubílstjórinn hafi snöggreiðst og ráðist á hinn manninn. Árásin á hafa staðið yfir í um það bil 30 sekúndur og hafi fórnarlambið verið lamið ítrekað í andlitið.

Árásin hafi svo verið stöðvuð af fólki á svæðinu og hringt hafi verið á lögregluna en þegar hún kom á svæðið var árásarmaðurinn flúinn í leigubíl sínum. Fórnarlambið hafi í kjölfarið verið flutt með sjúkrabíl af vettvangi.

Samkvæmt Ásdísi er verið að bíða eftir frekari gögnum svo hægt sé að senda málið til ákærusviðs. Þá sagði hún einnig að það liggi ljóst fyrir hver gerandinn í árásinni er.