Snorri Másson, varaformaður Miðflokksins, segir að umræðan sem skapaðist í vetur í kjölfar ummæla hans um regnbogafánann og flöggun hinseginfána í skólum hafi byggst á rangfærslum og ósanngjarnri túlkun. Þetta kom fram í viðtali hans í þættinum Spjallið með Frosta Logasyni á Brotkasti.
Snorri hafnaði því að hann eða Miðflokkurinn væru andvíg réttindum samkynhneigðra og sagði að hvorki innan flokksins né í eigin málflutningi hefði verið stuðningur við að skerða jafnan rétt fólks vegna kynhneigðar. Að hans mati hafi andstæðingar hans vísvitandi snúið út úr orðum hans og látið líta svo út að hann væri að ráðast gegn réttindum hinsegin fólks.
Í viðtalinu gagnrýndi hann jafnframt Einar Þorsteinsson, oddvita Framsóknarflokksins í borgarstjórn Reykjavíkur, harðlega vegna ummæla sem Einar lét falla í kjölfar Kastljóssviðtals Snorra síðasta haust. „Svo eru svona týpur eins og Einar Þorsteinsson í Framsókn sem hefur ráðist að mér með ógeðfelldum hætti, svo það sé sagt, og hefur grafið undan sínum trúverðugleika,“ sagði Snorri.
Snorri ítrekaði þó að hann hefði efasemdir um flöggun hinseginfána í skólum. Að hans mati hefði regnboga- og transfáninn þróast í pólitískt tákn sem tengdist ákveðinni hugmyndafræði fremur en almennri samstöðu. Hann sagði markmið sitt vera að vernda börn og ungmenni sem glímdu við erfiðar félagslegar aðstæður eða kynvitundarvanda og taldi mikilvægt að fleiri sjónarmið fengju vægi í umræðunni. Hann sagði einnig að ekki ætti að líta svo á að Samtökin '78 hefðu eitt umboð til að móta stefnu eða ráðgjöf um slík málefni.
