Síðustu helgi hélt rapparinn Herra Hnetusmjör stórtónleika í Laugardalshöll og mætti mikill fjöldi gesta til að skemmta sér á tónleikunum.
Einn af þeim gestum var tónlistargagnrýnandinn Jónas Sen en hann skrifaði dóm um tónleikana á Vísi.
„Herra Hnetusmjör skilaði af sér tæknilega óaðfinnanlegri og sviðslega áhrifaríkri sýningu. Hann vissi nákvæmlega hvernig átti að hreyfa við salnum og gerði það af mikilli kunnáttu,“ skrifar Jónas um frammistöðu rapparans.
„En hann kann sömuleiðis aðeins eitt trix. Þegar bassinn þagnar og ljósin kvikna stendur ekkert eftir nema eyrnasuð og tilfinningin fyrir því að hafa verið plataður. Þetta var sýning sem gaf okkur allt í yfirborði og sprengingum - en var að lokum jafn raunverulega hættuleg og kókómjólkin sem hann gleymdi að drekka í æsku.“
Jónas hefur verið einn beittasti tónlistargagnrýnandi Íslands á undanförnum áratugum og vakti gagnrýni hans á Jülevenner-tónleika Emmsjé Gauta síðustu jól mikla athygli.
