Karlmaður á fertugsaldri hefur verið dæmdur í tveggja mánaða fangelsi fyrir húsbrot eftir að hafa ruðst inn í hjólhýsi í Reykjavík í júní á síðasta ári.

Samkvæmt ákæru lögreglustjórans á höfuðborgarsvæðinu braust maðurinn í heimildarleysi inn í hjólhýsi í Reykjavík föstudaginn 13. júní 2025. Hann játaði brotið skýlaust fyrir dómi.

Í dóminum kemur fram að maðurinn eigi langan sakaferil að baki sem nær aftur til ársins 2007. Hann hefur ítrekað hlotið dóma fyrir ýmis brot. Þá segir einnig að maðurinn hafi framið brotið aðeins degi eftir að Landsréttur dæmdi hann í tólf mánaða fangelsi árið 2025.

Við ákvörðun refsingar leit dómurinn meðal annars til umfangsmikils sakaferils hans, en jafnframt til þess að hann játaði brotið tafarlaust. Refsingin þótti því hæfilega ákveðin tveggja mánaða fangelsi.

Maðurinn var jafnframt dæmdur til að greiða verjanda sínum rúmlega 282 þúsund krónur í málsvarnarlaun.