Sindri Daði Rafnsson, einn af stjórnendum Skjaldar Íslands, segir í færslu á samfélagsmiðlum að hópurinn hafi hafið bolasölu. Í sömu færslu tilkynnir hann að hópurinn hafi breytt um merki.
„Skjöldur Íslands vill þakka þeim fjölda manns sem hefur sent okkur stuðning, hvatningu og skilning á því sem við lögðum af stað með,“ skrifar Sindri. „Svo sannarlega náðum við athygli á ýmsum málefnum sem við veltum fyrir okkur ásamt fjölda manns. En í ósigri felst sigur og þrátt fyrir ótrúlega atburðarrás í kjölfar foreldraröltsins það örlagaríka föstudagskvöld og þau ósannindi og ljótu ávirðingar sem á okkur hafa verið bornar, þá svörum við kalli mörg þúsund manns.“
Í framhaldi þess segir hann að hægt verði að kaupa boli með nýju merki hópsins og munu bolirnir kosta 4.900 krónur. Ástæða þess að hópurinn breytti um merki segir Sindri vera tillitsemi við Frímúrararegluna. „Það verður áhugavert hvernig út úr þessu verður snúið!“ skrifar hann.
Hópurinn hefur þótt mjög umdeildur síðan hann kom fram á sjónarsviðið í júlí. Meðlimir hópsins sögðust vilja vernda íbúa Íslands frá innflytjendum með „foreldraröltum“. Athygli vakti að nokkrir af virkum meðlimum hópsins höfuð hlotið dóma fyrir ofbeldi og er Sindri Rafn einn af þeim en hann var sakfelldur fyrir vopnað bankarán í Danmörku þegar hann var yngri.
Þá þótti fyrra merki hópsins einnig umdeilt en þessi sami kross var notaður af norska hryðjuverkamanninum Anders Breikvik í stefnuyfirlýsingu sinni árið 2011. Krossinn á rætur að rekja til kristinna krossfara frá 12. öld sem vernduðu Jerúsalem og drápu múslima.
Hópurinn hefur neitað öllum ásökunum um fordóma.
„Allt tal um rasista, nasista, þjóðernissinna og tengingu á merki okkar, letur og nafn hópsins er kjánaleg tilraun til að rakka okkur niður,“ sagði hópurinn í yfirlýsingu í júlí.
„Það er áhyggjuefni að umræða á jaðrinum sem þótti áður algjör skandall sé kominn í meginstrauminn og þá verða hlutir hættulegri, ef kynþáttahatur er normalíserað,“ sagði Íris Björk Ágústsdóttir stjórnmálafræðingur í viðtali við Mannlíf um hópinn í júlí.
