Tvær viljayfirlýsingar um uppbyggingu íbúðarhúsnæðis í Reykjavík á næstu árum voru undirritaðar á föstudaginn.
Annars vegar var samið við Bjarg íbúðafélag og hins vegar við Félag íslenskra náttúrufræðinga (FÍN) og Visku, stéttarfélag háskólamenntaðra. Verkefnin eru sögð falla vel að markmiðum húsnæðisstefnu Reykjavíkurborgar um fjölbreytt húsnæðisframboð og aukna félagslega blöndun í hverfum borgarinnar.
Samkvæmt samkomulaginu við Bjarg hyggst Reykjavíkurborg úthluta félaginu lóðum með byggingarrétti fyrir búseturéttar- og leiguíbúðir á nokkrum svæðum, þar á meðal í Gufunesi, á Veðurstofuhæð, í Grundarhverfi á Kjalarnesi og á Kringlureit. Í viljayfirlýsingunni við FÍN og Visku er jafnframt gert ráð fyrir vilyrði um uppbyggingu á þróunarlóðum.
Í báðum samningunum er lögð áhersla á fjölbreyttar húsagerðir, blandaðar íbúðategundir innan hverfa og aukið framboð smærri íbúða fyrir ólíka hópa samfélagsins. Þá munu félögin framselja Félagsbústöðum 5 til 10 prósent íbúða á kostnaðarverði.
Borgarráð samþykkti einnig að Bjarg íbúðafélag taki við lóðarvilyrði fyrir byggingarrétti á allt að 50 íbúðum við Leirtjörn vestur í Úlfarsárdal. Lóðin hafði áður verið úthlutað Leigufélagi aldraðra og er gert ráð fyrir að þar verði byggt hagkvæmt húsnæði fyrir eldri borgara.
„Ég fagna þessum viljayfirlýsingum mjög og þessu öfluga samstarfi um uppbyggingu fjölbreytts og aðgengilegs húsnæðis í Reykjavík,“ sagði Heiða Björg Hilmisdóttir. „Það er frumskylda sveitarfélaga að stuðla að því að fólk geti eignast öruggt heimili á viðráðanlegum kjörum og með þessum verkefnum tökum við mikilvæg skref til að mæta þeirri ábyrgð af festu og metnaði.“
