Nýtt frumvarp ríkisstjórnarinnar um dýrahald í fjölbýlishúsum hefur vakið mikla athygli, sérstaklega hjá gæludýraeigendum, en nái það í gegn þurfa gæludýraeigendur ekki að fá samþykki hjá nágrönnum sínum í fjölbýli vilji þeir fá sér hund eða kött. Stefán Pálsson, sagnfræðingur og varaborgarfulltrúi, telur að frumvarpið gæti verið talsvert betra.
„Það eru skiptar skoðanir á frumvarpi félagsmálaráðherra um hunda og ketti í fjöleignarhúsum og einhvern veginn finnst manni blasa við að því verði ýtt útaf borðinu í þinglokasamningum,“ skrifar Stefán á Facebook. „En ef það verður afgreitt eða endurflutt í haust þætti mér eðlilegt að bæta inn klausu sem tekur skýrt fram að þessir hundar verði að vera skráðir.“
Að sögn Stefáns eru aðeins um fjórðungur hunda í Reykjavík skráður löglega en skráningunni fylgir árlegt gjald, en innifalið í því er trygging fyrir slysum sem hundurinn kynni að valda.
„Vissulega kaupa margir eigendur óskráðra hunda gæludýratryggingu sem getur innihaldið ábyrgðartryggingu - en þessi tölfræði bendir samt til þess að mjög hátt hlutfall hunda, væntanlega meira en helmingur, sé ótryggður.“
Gjaldþrota hundaeigendur
Þetta segir Stefán að sé ekkert gamanmál og aukinn þéttleiki byggðar og vaxandi hundaeign muni óhjákvæmilega leiða til þess að atvikum þar sem hundar bíta fólk eða valda skaða hlýtur að fjölga.
„Það er bara einfalt reikningsdæmi og hefur ekkert að gera með það hvort fólk sé hlynnt eða andsnúið hundahaldi. Ótryggður hundur sem veldur slysi getur hæglega leitt til gjaldþrots eigandans sem þar með er persónulega skaðabótaskyldur - að ekki sé talað um hversu erfitt kann að reynast fyrir fórnarlambið að sækja bætur.
Ef stór hluti bílaflotans reyndist vera ótryggður myndu stjórnvöld samstundis grípa til aðgerða, þegar kemur að óskráðum og/eða ótryggðum hundum er hins vegar ekkert kerfi sem hægt er að grípa til. Sá sem er gripinn á nagladekkjum um hásumar getur fengið tugþúsunda sekt á hvert dekk, en það að eiga óskráðan hund hefur engar afleiðingar. Það er ekki gott fyrir neinn - allra síst hundavini.“
