Sjálfstæðismenn ætla ekki að leyfa þingstörfum að halda áfram, nema Kristrún Frostadóttir forsætisráðherra bakki með umkvörtun sína um „falsfréttastíl“ í umræðum þeirra.

Hildur Sverrisdóttir tók til máls við upphaf þingfundar í dag og boðaði að ekki væri „hægt að halda áfram“. Sjötti dagur annarrar umræðu á sér stað í dag um veiðigjöldin. Njáll Trausti Friðbertsson, þingmaður Sjálfstæðisflokksins, segir ummælin „skammarleg“.

Kristrún lét orðin falla í Kastljósinu á RÚV í gærkvöldi. „Ég hef upplifað hjá þinginu svo ég segi það bara alveg hér hreint út að það hefur verið í falsfréttastíl hvernig umfjöllun um þetta mál hefur verið hjá minnihlutanum,“ sagði hún. „Það er verið að hræra í pottunum til þess að skapa ótta til þess að skapa óvissu og það er ekki gott.“

Vill stjórnarandstaðan að málið verði tekið af dagskrá, unnið betur í alla staði, en meirihlutinn vill klára málið og ganga til atkvæðagreiðslu enda sé það hin lýðræðislega leið sem farin er hér á landi.

Strax í gærkvöld hófu þingmenn stjórnarandstöðunnar umræðu um fundarstjórn þar sem stjórnarandstaðan lýsti vanþóknun sinni á ummælum forsætisráðherra í Kastljósi; slík ummæli væru alls ekki til að auðvelda fyrir um framhald viðræðna um afgreiðslu mála sem og þinglok.

„Krafa okkar að þessi orð hennar verði dregin til baka, og að forseti hlutist til um það, því auðvitað er það svo að þegar við erum hér að nálgast þinglokin og erum hér í samningaviðræðum í hinu lýðræðislega verkefni að ná hér samkomulagi um þinglok þá getur það samtal að sjálfsögðu ekki haldið áfram meðan þessi orð standa óleiðrétt,“ sagði Hildur.

Þingmenn stjórnarandstöðunnar hafa verið stóryrtir í garð ríkisstjórnarinnar og frumvarpsins um veiðigjöldin. Sagði Jón Pétur Zimsen, þingmaður Sjálfstæðisflokksins, að pólitíkin í málinu væri „viðurstyggileg“ og Rósa Guðbjartsdóttir, úr sama flokki, sagði það bera merki „hreins og tærs sósíalisma og forræðishyggju“.