Bæjarráð Fjarðabyggðar hefur skorað á atvinnumálaráðherra að hefja undirbúning að því að leyfi til fiskeldis í Mjóafirði verði boðin út. Til að það gerist þarf að uppfæra núverandi burðarþolsmat.
Formaður bæjarráðsins segir að Mjófirðingar vilji fiskeldi til að byggja upp atvinnu á staðnum, eins og austurfrett.is greindi fyrst frá.
Íbúar í Mjóafirði eru 13 talsins. Í kynningu Visit Austurland segir að Mjóifjörður sé þekktur fyrir ósnortna náttúru. „Í landi sem er þekkt fyrir ósnortna staði sem eru úr alfaraleið, má samt færa rök fyrir því að Mjóifjörður sé sá afskekktasti.“
Bæjarráð Fjarðabyggðar sendi nýlega frá sér bókun þar sem ítrekaðar voru fyrri bókanir þess efnis að mikilvægt sé að bjóða sem fyrst út leyfi til eldis í Mjóafirði.
Hér áður fyrr var það þannig að fiskeldisfyrirtæki óskuðu sjálf eftir leyfum innan þeirra reglna er þá giltu, en því var síðan breytt fyrir sex árum í þá átt að eldissvæði yrðu boðin út.
Reglugerð varðandi útboðin, er kveður á um að ráðherra ákveði hvenær sem og hve mörgum eldissvæðum sé úthlutað, tók gildi fyrir fimm árum síðan.
Samkvæmt Austurfrétt liggur fyrir burðarþolsmat á Mjóafirði um að þar sé hægt að ala tíu þúsund tonn af laxi, en matið hefur hins vegar ekki verið uppfært og þá hefur málið einnig strandað á því að ný lög um lagareldi hafa ekki verið samþykkt. Er staða þeirra reyndar óljós eftir ríkisstjórnarskiptin í vetur.
Formaður bæjarráðs Fjarðabyggðar og oddviti Sjálfstæðisflokksins, Ragnar Sigurðsson, telur að lögin eigi ekki að geta hindra útboð í Mjóafirði:
„Lögin hafa áhrif en það ætti ekki að stranda á þeim. Mjóifjörður er nýtt eldissvæði sem fellur undir útboðsskyldu. Það eru ýmsar ástæður en að mínu viti eru færri ljón í veginum en oft áður. Í raun strandar þetta ekki á öðru en pólitískum vilja ráðherra.“
Segir Ragnar að áhugi sé hjá fiskeldisfyrirtækjum að hefja starfsemi í Mjóafirði, og einnig á meðal íbúa þar:
„Í Mjóafirði hefur áður verið fiskeldi. Íbúar hafa kallað eftir atvinnuuppbyggingu og þar er laxeldi meðal þess sem kemur til greina.“
Fram kemur í bókun bæjarráðs að „núverandi kyrrstaða sé ekki í samræmi við jákvæða byggðaþróun, né heldur þá ábyrgð sem fylgi því að styðja við brothættar byggðir.“
Hafa kannanir sýnt að 60 til 70 prósent Íslendinga séu á móti fiskeldi í opnum sjókvíum, en andstaðan er þó minni á Austurlandi sem og Vestfjörðum, þar sem mest eldi er stundað, en í öðrum landshlutum:
„Landsmenn hafa efasemdir en minnsta andstaðan er þar sem menn hafa séð ávinning af eldinu. Mjófirðingar hafa séð ávinning af eldi annars staðar í Fjarðabyggð og þurfa atvinnuuppbyggingu til að snúa við byggðaþróuninni. Þess vegna held ég að laxeldi sé einmitt það sem Mjófirðinga vantar.“
