Þórður Snær Júlíusson, framkvæmdastjóri þingflokks Samfylkingarinnar, hvetur landsmenn til að samþykkja næsta skref í Evrópumálum Íslands í þjóðaratkvæðagreiðslu 29. ágúst. Í grein sinni á Vísi rifjar hann meðal annars upp fyrri afstöðu forystumanna Sjálfstæðisflokks og Framsóknarflokks til aðildarviðræðna við Evrópusambandið.
Þórður vísar sérstaklega til ummæla Bjarna Benediktssonar frá árinu 2009, þegar Bjarni sagði engan gjaldmiðilskost jafn sterkan og evruna með ESB-aðild og lagði áherslu á að þjóðin ætti að fá að taka afstöðu til málsins.
Þá rifjar Þórður upp að bæði Sjálfstæðisflokkur og Framsóknarflokkur hafi á sínum tíma lagt ríka áherslu á að þjóðin ætti síðasta orðið um framhald aðildarviðræðna. Hann nefnir einnig fyrri ummæli Sigmundar Davíðs Gunnlaugssonar um að fordæmi væru fyrir sérlausnum í aðildarsamningum ríkja við Evrópusambandið.
„Og ég er sammála Guðrúnu Hafsteinsdóttur anno 2014 um að ég „treysti þjóðinni algerlega í þessu máli“, en þar af leiðandi að öllu leyti ósammála Guðrúnu Hafsteinsdóttur árið 2026 sem er komin á algjörlega gagnstæða skoðun,“ skrifar Þórður.
Þórður segir stöðu Íslands gagnvart Evrópusambandinu hafa styrkst verulega frá því að aðildarviðræður fóru síðast fram. Efnahagsstaðan sé sterkari, alþjóðleg þróun hafi aukið mikilvægi Íslands og íslensk fyrirtæki séu betur í stakk búin til að nýta tækifæri sem aðild gæti skapað.
Hann leggur áherslu á að Ísland muni krefjast sérlausna vegna sjávarútvegs, landbúnaðar og yfirráða yfir auðlindum sínum. Markmiðið eigi að vera að fá fram hvað Íslandi standi raunverulega til boða og leggja niðurstöðuna síðan í hendur þjóðarinnar.
„Ekki vera hrædd. Verið spennt,“ skrifar Þórður og segir fyrsta skrefið vera að segja já í þjóðaratkvæðagreiðslunni 29. ágúst.
