Mikil spenna er nú vegna myndunar meirihluta í Reykjavík. Hildur Björnsdóttir, leiðtogi Sjálfstæðismanna, þykir hafa á hendi þau spil sem þarf til að taka völdin. Þar er helst horft til þess að kippa Miðflokknum um borð og nýta sér þannig yfirburðaþekkingu oddvitans, Ara Edwald, á rekstri. Ari er umdeildur en hefur stjórnað sumum af stærstu fyrirtækjum landsins og þykir einkar vel til þess fallinn að leiða endurreisn borgarinnar frá ringulreið til sjálfsbjargar. Hans vandi hefur verið talinn af persónulegum toga en ekki faglegum. 

Innan Viðreisnar er lagt að Björgu Magnúsdóttur, oddvita flokksins, að slá af þann möguleika að mynda þriggja flokka meirihluta með Framsókn og Sjálfstæðisflokknum. Þar er vísað til þess af fenginni reynslu að Einari Þorsteinssyni, leiðtoga Framsóknarflokksins, sé ekki treystandi og eins manns meirihluti gangi ekki upp þess vegna. 

Helstu áhyggjur Sjálfstæðismanna eru þær að Miðflokkurinn sæki að þeim í vinsældum og fylgi og raddir eru uppi um að ekki sé í því ljósi gott að lyfta þeim á stall. Þá sé óvíst að átakasækinni Hildi takist að lynda við Miðflokksmennina fremur en sinn eigin flokk á síðasta kjörtímabili. Heppilegra sé að taka sénsinn á Einari og halda stjórn á reynslulítilli Björgu.

Úr þessu fæst skorið á næstunni en líkur eru á því að Ari verði tekinn um borð og jafnvel gerður að borgarstjóra hluta kjörtímabilsins og þá jafnvel strax til að marka stefnuna og hefja tiltektina.  …