Styrkur svifryks (PM10) mældist hár á loftgæðamælistöðum í Reykjavík í morgun. Samkvæmt mælingum var gildi PM10 klukkan 12 við Grensásveg 93,4 míkrógrömm á rúmmetra, sem er nær tvöfalt yfir sólarhringsheilsuverndarmörkum sem eru 50 míkrógrömm á rúmmetra. Þetta kemur fram í tilkynningu frá Reykjavíkurborg.

Uppruni mengunarinnar er fyrst og fremst ryk frá umferð. Þar sem götur eru þurrar og vindur hægur þyrlast ryk auðveldlega upp og helst lengur á lofti. Rykbinding var framkvæmd aðfaranótt miðvikudags, en vegna veðuraðstæðna hefur hún ekki dugað til að halda mengun innan marka. Rykbinding er samvinnuverkefni Reykjavíkurborg og Vegagerðin.

Veðurspá gerir ráð fyrir áframhaldandi hægum vindi á morgun og því er hætta á frekari svifryksmengun. Lítil úrkoma er í kortunum fram yfir miðja næstu viku. Að sögn yfirvalda verður skoðað hvort grípa þurfi til frekari rykbindingar til að draga úr mengun.

Viðkvæmir hvattir til að forðast langa útivist

Fólk sem er viðkvæmt fyrir í öndunarfærum, aldraðir og börn eru hvött til að forðast útivist í lengri tíma og takmarka líkamlega áreynslu. Almenningur er jafnframt hvattur til að draga úr notkun einkabílsins þar sem því verður við komið, til dæmis með því að fresta óþarfa ferðum, nýta almenningssamgöngur, sameinast í bíla eða velja vistvænni samgöngumáta.

Fyrirtæki eru hvött til að hvetja starfsfólk til fjarvinnu á svifryksdögum ef mögulegt er og draga úr akstri eftir fremsta megni.

Heilbrigðiseftirlit Reykjavíkur fylgist náið með loftgæðum í borginni og mun senda frá sér viðvaranir og leiðbeiningar ef tilefni er til. Hægt er að fylgjast með styrk svifryks og annarra mengandi efna á vefnum loftgaedi.is, þar sem einnig má sjá kort yfir mælistaði víðs vegar um landið.