Vilhjálmur Árnason hefur formlega látið af störfum sem alþingismaður eftir rúmlega þrettán ára setu á Alþingi. Forseti Alþingis greindi frá starfslokum hans við upphaf þingfundar í dag þegar lesin var upp tilkynning frá Vilhjálmi þess efnis.

Vilhjálmur var fyrst kjörinn á Alþingi fyrir Sjálfstæðisflokkinn í Suðurkjördæmi árið 2013 og sat á þingi samfellt allt fram að starfslokum sínum. Á þeim tíma gegndi hann fjölmörgum trúnaðarstörfum á vettvangi Alþingis og innan flokks síns.

Við upphaf þingfundar þakkaði Bryndís Haraldsdóttir, forseti Alþingis, honum fyrir framlag hans til þingstarfa og samstarf á þeim árum sem hann hefur setið á löggjafarþinginu.

Starfslok Vilhjálms tengjast nýju hlutverki hans í sveitarstjórnarmálum. Hann leiddi lista Sjálfstæðisflokksins í Reykjanesbæ í sveitarstjórnarkosningunum sem fram fóru nýverið. Í kjölfar kosninganna náðu Sjálfstæðisflokkurinn og Miðflokkurinn saman um myndun nýs meirihluta í bænum.

Vilhjálmur hefur nú tekið við embætti bæjarstjóra Reykjanesbæjar og lætur því af þingmennsku til að sinna því starfi.

Er hann því orðinn fjórði þingmaður Sjálfstæðisflokksins sem hættir eftir síðustu Alþingiskosningarnar en áður hættu þau Bjarni Benediktsson, Áslaug Arna Sigurbjörnsdóttir og Þórdís Kolbrún R. Gylfadóttir.