Fjölmiðlamaðurinn og stjórnmálaskýrandinn Egill Helgason er orðinn þreyttur á núverandi borgarfulltrúum ef marka má nýjan pistil sem hann birti á samfélagsmiðlum. Þar telur hann að það sé lítill munurinn á flokkunum en borgin sé þjökuð af skrifræði.

„Ég hef ekki farið dult með þá skoðun að þurfi að skipta út í borgarstjórninni í Reykjavík og fá inn nýtt fólk,“ skrifar Egill um málið en tekur fram að honum sé eiginlega sama hvaðan fólkið komi því flokkarnir séu sammála um flesta hluti.

„Þetta tengist líka því að langstærstur hluti af fé borgarstjórnarinnar fer í fyrirfram ákveðin og að miklu leyti lögbundin verkefni,“ segir fjölmiðlamaðurinn og það sé fjarska lítill sjóður sem borgarfulltrúar hafi til að ráðstafa að vild.

„En það er komin mikil valdþreyta í Ráðhúsið, sama fólk situr þar ár út og ár inn í sama þrasinu,“ heldur hann áfram. „Borgin virðist býsna þjökuð af vaxandi skrifræði - það er held ég nauðsyn að einfalda kerfið. Að öllu óbreyttu óttast ég að borgarstjórnarkosningarnar í vor verði mjög harðar en að umræðan fyrir kosningarnar verði ekki að sama skapi frjó. Að því er lýtur að mínum áhugamálum finnst mér nauðsynlegt að fari fram einhvers konar uppgjör gagnvart skelfilegri öfugþróun í skipulagsmálum og byggingalist. Það er reyndar langt í frá bara bundið við Reykjavík - dæmin sjáum við víðar um höfuðborgarsvæðið.“

Þá hvetur hann borgar- og bæjarfulltrúa til að lesa nýjustu bók Andra Snæs Magnússonar en hún nefnist Jötunsteinn.

„Þess utan eiga borg, bæir og ríki hæglega að geta komið sér saman um aðgerðir í húsnæðismálum - sérstaklega fyrir ungt fólk og leigjendur. Og það þarf að endurskoða álagningu fasteignagjalda - þar verður ríkið líka að koma að. Gengur ekki að síhækkandi fasteignagjöld séu svo mikilvægur tekjustofn,“ skrifar Egill að lokum.