Þorgrímur Þráinsson rithöfundur var gestur á upplýsingafundi almannavarnadeildar ríkislögreglustjóra nú síðdegis. Hann sagði nokkur hvatningarorð á fundinum og vitnaði í þjálfarann Lars Lagerbäck sem mun hafa sagt að litlir hlutir skapi stóra sigra. Þorgrímur segir þau skilaboð eiga vel við þessa dagana.
Þorgrímur hvetur landsmenn til að taka þátt í lestrarverkefninu Tími til að lesa sem Lilja Alfreðsdóttir, mennta-og menningarmálaráðherra, hleypti af stokkunum í upphafi mánaðar.
Þorgrímur er mikill talsmaður lesturs og segir læsi vera mikilvægt lýðheilsumál. Hann hvetur foreldra ungra barna til að virkja þau í lestri og biðja börnin um að staldra við ef þau skilja ekki þau orð sem koma fyrir í þeim texta sem þau eru að lesa og skrifa þau niður á blað. Hann segir að hægt sé að búa til leik út lestrinum.
„Þá er t.d. hægt að líma eitt nýtt orð á ísskápinn á hverjum degi og biðja börnin um að finna út hvað orðin þýða,“ sagði Þorgrímur. Hann sagði rannsóknir sýna að læsi skiptir miklu máli hvað sjálfstraust barna varðar.
Í lokin minnti Þorgrímur fólk á að rétta fram hjálparhönd til barna ef þau þurfa á aðstoð að halda. Hann segir mikilvægt að veita börnum athygli og hjálp, ekki síst núna.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir