Starfsmaður Hótel Austurs segir að tveir starfsmenn hefðu orðið veikir af Nóró-veirunni sem fylgdi gestum hótelsins um helgina.
Eins og fram hefur komið í fréttum undanfarna daga kom upp svæsin Nóró-veira í tveimur hópum sem ferðuðust Austanlands um helgina. Svo fór að fimm enduðu á sjúkrahúsi og ein kona á níræðisaldri lést á Sjúkrahúsinu á Akureyri, vegna veirunnar.
Fram kemur í frétt Austurfréttar að Nóró-veiran sé skæð magapest sem veldur uppköstum og niðurgangi auk þess sem henni geta fylgt frekari kvillar á borð við hita og höfuðverk.
Í fréttinni er rætt við Láru Guðmundsdóttur, framkvæmdastjóri Heilbrigðiseftirlits Austurlands, sem segir að svo virðist sem annar hópurinn hafi komið slappur inn á hótelið og smitað hinn hópinn. Erfitt sé þó að komast að því hvaðan smitið kom upprunalega.
Mannlíf hringdi á Hótel Austur á Reyðarfirði, en þar sem hótelstjórinn, Gunnar Viðar Þórarinsson, er í fríi, ræddi blaðamaður við starfsmann að nafni Jónas og spurði hann út í heilsu starfsmanna hótelsins en nokkrir þeirra smituðust einnig af veirunni skæðu. „Það fengu tveir starfsmenn í magann og smá ælupest en það var búið á 12 tímum sko. En við tókum þá bara út í tvo daga til öryggis. En þetta virðist vera búið, það hefur enginn smitast neitt meira, blessunarlega.“
Austurfrétt hefur eftir Láru Guðmundsdóttur að Hótel Austur hafi gert allt rétt í málinu: „Já, ég held það en það er ömurlegt að horfa upp á svona hluti ske, það er ekki nokkur einasta leið að sjá við þessu,“ sagði Jónas, aðspurður um orð Láru.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir