Óhætt er segja að knattspyrnuunnendur landsins hafi orðið hissa eftir tilkynnt var um val á landsliði kvenna í knattspyrnu.
Í gær tilkynnti Þorsteinn Halldórsson, landsliðsþjálfari, nöfn þeirra leikmanna sem verða í landsliðshóp Íslands sem mætir Wales og Þýskalandi síðar í september. Val Þorsteins hefur verið harðlega gagnrýnt af knattspyrnuunnendum enda ekki á hverjum degi sem varamarkmaður liðs fái sæti í landsliði.
Orri Rafn Sigurðarson setti fram færslu um málið og upphófst áhugaverð umræða í kringum valið í þræði Orra.
Þorsteinn ákvað að velja Söndru Sigurðardóttur, varamarkmann Vals, í hópinn en fyrir um það bil hálfu ári ákvað Sandra að hætta knattspyrnuiðkun og lagði hanskana á hilluna. Hún hætti nýlega við þá ákvörðun og hefur spilað einn leik í Bestu deild kvenna síðan. Óumdeilt er að Sandra sé ein af bestu markmönnum Íslandssögunnar en það hlýtur að teljast mikið áfall fyrir aðra markmenn Bestu deildar kvenna að varamarkmaður Vals sé valin fram yfir þær.
Þorsteinn gaf upp ástæður valsins í viðtali við Fótbolti.net
„Markvarðarstaðan er þannig að þér og markverðinum líði vel með þær aðstæður sem þær fara út í. Það er fullt af markvörðum sem hafa spilað vel og aðrir misjafnir. Ég vil fara inn í verkefnið með ákveðna reynslu, mér finnst það skipta gríðarlega miklu máli. Þegar að maður er þjálfari þá þarf maður að taka erfiðar ákvarðanir, ég stend og fell með minni ákvörðun. Ég hef rætt þetta við marga í kringum mig og það hefur enginn sagt við mig neitt annað en að þetta sé rétt hjá mér,“ sagði Þorsteinn.
Þá hefur sú ákvörðun Þorsteins að velja ekki Bryndísi Örnu Níelsdóttur í landsliðið vakið mikið umtal en Bryndís er langmarkahæst í Bestu deild kvenna en hún hefur skorað í 14 mörk í deildinni. Næstmarkahæsti leikmaður deildarinnar er Agla María Albertsdóttir en hún hefur skorað sjö mörk, eða helmingi færri mörk en Bryndís. Þrír framherjar voru valdir í landsliðið sem spila á Íslandi og hafa þeir skorað samtals 16 mörk. Enn meira umtal en sú ákvörðun að velja ekki Bryndísi eru þó orð sem Þorsteinn hafði um leikmanninn í viðtali við Fótbolti.net.
„Bara, mér finnst hún ekki alveg klár í þetta,“ sagði Þorsteinn um að velja ekki Bryndísi.
„Ég horfði á hana um daginn með U23 ára landsliðinu á móti Danmörku, það vantaði svolítið upp á hjá henni þar. Maður horfir svolítið í það á alþjóðlegum mælikvarða hvar leikmenn standa. Mér fannst hún ekki klár eins og staðan er í dag. Vonandi sýnir hún bara í komandi leikjum með U23 ára landsliðinu að hún sé klár í A-landsliðið.“
Eins og áður segir þá er Bryndís langmarkahæst í Bestu deildinni og hlýtur að sú staðreynd að hún skori á við þrjá framherja landsliðsins til samans að benda til þess að hún standi að minnsta á sama stað og þær á „alþjóðlegum mælikvarða“. Þá er þetta ekki fyrsta skipti sem Þorsteinn er gagnrýndur fyrir að velja ekki Bryndísi en það kom mjög á óvart að hún hafi ekki verið valin í hópinn seinast þegar landsliðið spilaði.
Athugasemdir