Bresk-írski leikarinn Ben Keaton, sem meðal annars lék í sjónvarpsþáttunum Father Ted, er látinn, 69 ára að aldri. Fjölskylda hans greindi frá andlátinu og lýsti því sem „óvæntu“.
Keaton, sem fæddist sem Ben Burke-Kennedy, er best þekktur fyrir hlutverk sitt sem presturinn Austin Purcell í þáttunum Father Ted, þar sem hann kom fram í einum þætti árið 1996. Hann lék einnig í þáttum á borð við Casualty, Doctors, barnasjónvarpinu Hububb og sápuóperunni Emmerdale.
Í minningargrein í The Irish Times skrifaði fjölskylda hans:
„Ben verður að eilífu sárt saknað, elskaður og minnst með hlýju af fyrrverandi eiginkonu sinni Polly, syninum Waldo og dótturinni Daisy, bræðrum sínum Des og Thom og systur sinni Jeanette.“
Fyrrverandi eiginkona hans, Polly Kelly Keaton, heiðraði minningu hans á Facebook og sagði:
„Það er ótrúlega sárt að segja frá því að Ben Keaton lést í gærkvöldi. Þetta kom mjög skyndilega og við erum öll í áfalli.“
Hún bætti við að þótt þau hefðu skilið fyrir nokkrum árum hefðu þau átt langa og eftirminnilega samveru:
„Hann var frábær pabbi fyrir Waldo og Daisy.“
Aðdáendur minntust hans einnig á samfélagsmiðlum og rifjuðu upp hlutverk hans í Father Ted, þar sem persóna hans var kölluð „leiðinlegasti prestur í heimi“. Áratugum eftir að hafa tekið að sér hlutverkið endurvakti Keaton séra Austin til að stjórna pöbbkvissum í karakter og árið 2015 hóf hann eigin vefþáttaröð sem presturinn, sem bar titilinn „Cook Like A Priest“.
Auk sjónvarpsstarfa átti Keaton farsælan feril í leikhúsi og kom meðal annars fram í uppfærslum á Cyrano de Bergerac, American Buffalo og Harvey í Royal Exchange-leikhúsinu í Manchester. Þá hlaut hann Olivier-verðlaunin í fyrra fyrir að skapa Brainiac Live.
Hér má sjá atriði úr Father Ted þar sem séra Austin drepur kollega sína úr leiðindum.
Athugasemdir