Ástin bjargaði Guðmundi Inga frá glötun

Guð­mundur Ingi Þór­odds­son, for­maður Afstöðu, félags fanga, leiðir lista Flokkur fólks­ins í Reykja­vík. Í við­tali við Mannlíf fer hann yfir helstu áherslur sínar í borg­ar­málum, meðal ann­ars hús­næð­is­mál, stöðu eldri borg­ara og stuðn­ing við fólk sem stendur höllum fæti í sam­fé­lag­inu, þar á meðal fyrr­ver­andi fanga.

Guð­mundur Ingi segir einnig frá afstöðu flokks­ins til Borg­ar­lín­unnar og telur þörf á að end­ur­meta sam­göngusátt­mála ríkis og sveit­ar­fé­laga. Þá ræðir hann opin­skátt um eigin for­tíð og reynslu af fang­els­is­vist og segir þá reynslu hafa mótað sig og orðið honum styrkur í dag. Markmið sitt sé meðal ann­ars að styðja aðra og leggja sitt af mörkum til sam­fé­lags­ins.

Í einum kafla við­tals­ins segir Guð­mundur Ingi frá því hvernig ástin bjarg­aði honum frá glötun. Þann kafla má lesa hér fyrir neðan.

Ástin bjargaði mér

Guð­mundur Ingi var frels­inu feg­inn eftir að hafa setið inni á Litla-Hrauni. Hann fór ekki í með­ferð því ástin bjarg­aði honum. Hann kynnt­ist eig­in­manni sínum áður en hann var settur inn í seinna skiptið og hætti þá í neyslu hans vegna. Hann hefur verið edrú síðan. Ástin í lífi Guð­mundar Inga er frá Rúmeníu, en þeir kynnt­ust og bjuggu fyrst saman á Spáni.

„Í raun og veru fékk ég ekki að bjóða honum út nema að vera edrú. Það var það sem hjálp­aði mér. Það er alveg ljóst að það var ástin sem bjarg­aði mér í raun og veru og breytti minni stefnu,“ segir hann.

Ástin hafi verið klett­ur­inn í bata hans.

„Ég væri ekki að gera það sem ég er að gera í dag, alveg sama hvað það er, ef ekki væri fyrir Tito eins og hann er kall­aður. Það er alveg ljóst. Ég og sam­fé­lagið eigum honum það að þakka.“

Þeir hafa verið saman í átján ár og giftir í þrettán ár.

„Það sem dreif mig líka áfram var að ég sá hvað ég var að gera ást­vini mínum með neysl­unni. Það getur tekið menn tíma að átta sig á aðstæðum sínum en ég rank­aði við mér fyrir alvöru í seinna skiptið sem ég sat inni,“ segir Guð­mundur Ingi.

Hann fann að hann vildi sanna sig, byggja upp traust aftur og ná ein­hverjum árangri. Kannski hafi hann reynt of mikið með enda­lausri vinnu, en vinnan gefi honum einnig mikið.