Japis ehf., félag skráð í Rangárþingi ytra, hefur verið tekið til gjaldþrotaskipta samkvæmt úrskurði Héraðsdóms Norðurlands eystra frá 28. maí síðastliðnum.
Skiptafundur verður haldinn á skrifstofu skiptastjóra að Bæjarlind 4 í Kópavogi þar sem farið verður yfir lýstar kröfur og hugsanlegar eignir búsins.
Margir muna eflaust eftir plötuverslunni Japis sem starfaði á Íslandi á 20. öldinni en nafnið var síðar endurvakið árið 2011 og átti samkvæmt skráðum tilgangi að sinna smásölu í gegnum netið. En samkvæmt umfjöllun Morgunblaðsins frá 2016 fór aldrei fram neinn rekstur í félaginu og það skilaði aldrei ársreikningi.
Ásvaldur Friðriksson, eigandi félagsins, sagði í samtali við Fréttablaðið árið 2010 að stefnt væri að því að endurvekja hina þekktu plötuverslun Japis á netinu. Hann hafði áður starfað hjá upprunalega Japis og síðar eignast hlut í því félagi.
Upprunalega Japis ehf., sem rak plötuverslunina frá árinu 1978, varð gjaldþrota árið 2001 með skuldir upp á um 130 milljónir króna.
Nýja félagið, sem varð gjaldþrota í ár, virðist þó aðeins tengjast hinum eldri að takmörkuðu leyti fyrir utan nafnið.
Athugasemdir