Georg prins, elsti sonur Vilhjálms Bretaprins og annar í erfðaröð bresku krúnunnar, mun hefja nám við hinn virta einkaskóla Eton College í september næstkomandi. Þetta staðfesti Kensington-höll í stuttri yfirlýsingu á þriðjudag.
Georg er 12 ára gamall og mun þar með feta í fótspor föður síns og frænda, Harry prins, sem báðir voru nemendur við skólann. Eton er einn þekktasti og virtasti einkaskóli Bretlands og skólagjöld nema rúmlega 63 þúsund pundum á ári, jafnvirði um 11 milljóna íslenskra króna.
Skólinn, sem er staðsettur í Berkshire vestan við London, hefur um langt skeið verið tengdur við breska yfirstétt og hefur alið af sér fjölda áhrifamikilla einstaklinga. Meðal fyrrverandi nemenda eru fyrrverandi forsætisráðherrarnir Boris Johnson og David Cameron, auk leikarans Tom Hiddleston og rithöfundarins Ian Fleming.
Óljóst er hvort Georg muni búa á heimavist skólans, en Eton er aðeins í nokkurra kílómetra fjarlægð frá fjölskylduheimili hans í Windsor. Hann hefur þó undanfarin ár stundað nám við heimavistarskólann Lambrook School ásamt systkinum sínum, Karlottu prinsessu og Lúðvíki prins.
Eton College var stofnaður árið 1440 af Hinriki sjötta og tekur við drengjum á aldrinum 13 til 18 ára. Skólinn er þekktur fyrir að halda í margar gamlar hefðir, meðal annars einkennisbúning sem samanstendur af svörtum frakka, vesti, hvítum skyrtum og röndóttum buxum. Um 1.350 nemendur stunda þar nám ár hvert.
Athugasemdir