Dönsk stjórnvöld stefna að því að geta hafið flutning hælisleitenda, sem hefur verið synjað um hæli, í sérstakar móttökumiðstöðvar utan Evrópu á næsta ári. Fulltrúar fimm Evrópuríkja ræddu áform um slíkar miðstöðvar á fundi í Kaupmannahöfn í dag.
Morten Bødskov, ráðherra innflytjendamála í Danmörku, segir dönsk stjórnvöld gera ráð fyrir að geta sent fyrstu einstaklingana til samstarfsríkis fyrir árslok 2027.
Bødskov fundaði með ráðherrum Þýskalands, Hollands, Austurríkis og Grikklands um mögulega stofnun svokallaðra endursendingarmiðstöðva utan Evrópusambandsins.
„Þetta er mikilvægt skref í átt að skilvirkara hælis- og innflytjendakerfi,“ sagði Bødskov. Hann sagði jafnframt óásættanlegt að fólk sem dveldi ólöglega í Danmörku gæti áfram verið þar vegna erfiðleika stjórnvalda við að framfylgja brottvísunum.
Evrópuþingið samþykkti í júní hertar reglur í málaflokknum sem veita stjórnvöldum auknar heimildir til að vista fólk í varðhaldi og gera jafnframt ráð fyrir möguleikanum á endursendingarmiðstöðvum utan sambandsins.
Hugmyndir um slíkar miðstöðvar hafa sætt harðri gagnrýni mannréttindasamtaka.
Ekki hefur verið upplýst hvaða ríki gætu tekið þátt í samstarfinu við Danmörku og önnur Evrópuríki. Úganda og Rúanda hafa þó verið nefnd sem mögulegir kostir.
Bresk stjórnvöld hættu áður við umdeild áform um að senda hælisleitendur til Rúanda. Þá hafa móttökumiðstöðvar sem Ítalir reka í Albaníu sætt lagalegum ágreiningi og færri verið sendir þangað en upphaflega var gert ráð fyrir.
Athugasemdir