Siðanefnd Blaðamannafélags Íslands hefur vísað frá kæru Björns Inga L. Jónssonar á hendur Andrési Magnússyni, ritstjónarfulltrúa Morgunblaðsins, vegna umfjöllunar á mbl.is undir fyrirsögninni „Fiskveiðistefna ESB ófrávíkjanleg“.
Björn Ingi taldi að umfjöllunin hefði falið í sér brot gegn 1., 2. og 6. grein siðareglna Blaðamannafélags Íslands.
Sama dag kæran barst var Birni Inga bent á að augljósir vankantar væru á kærunni og honum gefinn kostur á að bæta úr þeim í samræmi við málsmeðferðarreglur siðanefndar. Hann svaraði ábendingunum samdægurs en breytti kærunni ekki í samræmi við þær.
Kæran laut að umfjöllun Andrésar um fiskveiðistefnu Evrópusambandsins. Björn Ingi taldi að í fréttinni hefði skoðun Rob Jetten, forsætisráðherra Hollands, um mögulegar undanþágur eða sérlausnir verið sett fram sem staðreynd. Sagði hann orðaval blaðamannsins gefa til kynna að vísvitandi væri reynt að villa um fyrir opinberri umræðu.
Siðanefnd benti hins vegar á að ákveðin skilyrði þurfi að vera uppfyllt svo kæra verði tekin til efnislegrar meðferðar. Meðal annars þurfi kærandi að hafa leitað leiðréttingar hjá viðkomandi fjölmiðli og vera aðili máls eða hafa ríkra hagsmuna að gæta.
Nefndin taldi vandséð að Björn Ingi væri aðili málsins. Í svari sínu við ábendingum nefndarinnar viðurkenndi hann jafnframt að málið varðaði hann ekki persónulega en sagði það varða upplýsta umræðu.
Björn Ingi kvaðst hafa sent blaðamanninum tölvupóst en sá póstur fylgdi ekki kærunni. Hann taldi jafnframt að krafa um að leita leiðréttingar ætti aðeins við þegar skrif blaðamanna vörðuðu viðkomandi aðila með beinum hætti.
Siðanefnd komst að þeirri niðurstöðu að Björn Ingi uppfyllti ekki málsmeðferðarreglur vegna kæra um meint brot á siðareglum Blaðamannafélags Íslands.
Málinu var því vísað frá nefndinni.
