Arnhildur Valgarðsdóttir hefur verið ráðin tónlistarstjóri, organisti og kórstjóri Glerárkirkju á Akureyri. Hún tekur við starfinu 1. október næstkomandi.

Í tilkynningu frá Glerárkirkju segir að Arnhildur búi yfir mikilli reynslu á sviði kirkjutónlistar. Hún hefur undanfarin ár starfað sem organisti og kórstjóri við Guðríðarkirkju í Reykjavík og hefur auk þess komið víða við í íslensku tónlistarlífi sem píanisti, undirleikari, tónlistarmaður og kennari.

Arnhildur er fædd og uppalin á Akureyri og á sterkar rætur fyrir norðan. Foreldrar hennar eru Dómhildur Sigurðardóttir frá Draflastöðum í Fnjóskadal og Valgarður Egilsson læknir, rithöfundur og leiðsögumaður.

Í tilkynningunni kemur fram að hún hlakki til að snúa aftur til heimabæjar síns. Þá segist Glerárkirkja fagna ráðningunni og telja að reynsla, fagmennska og metnaður Arnhildar muni styrkja öflugt tónlistarstarf kirkjunnar.