Kjartan Már Kjartansson, bæjarstjóri Reykjanesbæjar, er síður en svo sáttur við vöffluboð Sjálfstæðisflokksins í bænum, sem haldið verður fimmtudaginn 14 maí. Ástæðan er sú að viðburðurinn er haldinn í safnaðarheimili Keflavíkurkirkju.
Kjartan Már, sem er var ópólitískt ráðinn, birti skjáskot í kvöld á Facebook af viðburðarboði á vöfflukaffið en þar var Keflavíkurkirkja í bakgrunni. Skrifaði bæjarstjórinn:
„Finnst fólki þetta viðeigandi?“
Í kjölfar færslunnar sköpuðust líflegar umræður en fjölmargir tjá sig í athugasemdakerfinu og má glöggt sjá að nokkurs kosningaskjálfta gætir í fólki.
Fjölmargir svara Kjartani bæjarstjóra á þá leið að þeim finnist þetta ekki í lagi, þar á meðal Sigrún nokkur sem skrifar: „100% nei!!! Annað hvort er fólk alveg gífurlega ómeðvitað og samfélagslega ólæst, eða að pólitíkin í Reykjanesbæ er meðvitað að taka afskaplega hættulegt skref! Og hvar ætti maður að byrja varðandi afstöðu og hlutverk kirkjunnar.“
Margrét nokkur tekur undir og skrifar: „Eru x-D ekki með kosningaskrifstofu sem þeir geta boðið fólki uppá kaffi og vöfflur?? Eða er búið að færa hana inni safnaðarheimilið. Hoppukastali í Akurskóla, party á Hótel Keflavík. Hvert fer kosningaskrifstofan næst. Já allt fallt fyrir peninga. Púff þetta gæti nú komið eins og búmmerang í fangið á ykkur hvað varðar atkvæðaveiðar.“
Ekki eru þó allir sammála en kosningastjóri Sjálfstæðsflokksins í Reykjanesbæ, Hermann Nökkvi Gunnarsson þakkar bæjarstjóranum fyrir að vekja athygli á viðburðinum og segir ekkert óeðlilegt við að hafa ljósmynd af vettvangi viðburðarins en þó hefur myndinni nú verið breytt og má nú aðeins sjá girnilegar vöfflur á viðburðinum. Hermann skrifaði:
„Það eru að sjálfsögðu allir velkomnir í safnaðarheimilið í vöfflukaffi. Ekki er óeðlilegt að mynd sé af vettvangi viðburðarins og síður en svo skrýtið að merki þeirra sem haldi viðburðinn komi fram í myndinni. Þetta er ekkert nýtt af nálinni. Engu að síður, ef þetta strýkur einhverja vitlaust, þá er búið að uppfæra myndina. Hvet alla til að mæta í vöfflukaffið á fimmtudaginn þar sem Guðjón Þorgils tekur lagið:) Takk fyrir að vekja athygli á viðburðinum.“
Kjartan Már svarar Hermanni um hæl: „Bæjarstjóranum er stórlega misboðið að kirkjan okkar sé “misnotuð” með þessum hætti.“
Ísak Ernir Kristjánsson, tengdasonur Bjarna Benediktssonar, tekur einnig upp hanskann fyrir Sjálfstæðisflokkinn í sinni athugasemd sem hljóðar eftirfarandi:
„Mjög eðlilegt! Flokkurinn tekur reglulega á leigu safnaðarheimili víða um land. Kirkjan er og verður stór partur af samfélaginu og húsakosti hennar á að nota.“
Gísli nokkur bætir síðan um betur og bendir á nokkur dæmi þar sem Samfylkingin hefur haldið viðburði í Laugarneskirkju og Akureyrarkirkju.
Gengið verður til sveitarstjórnakosningar laugardaginn 16 maí næstkomandi.
