Karen Kjartansdóttir, almannatengill og fyrrverandi fjölmiðlakona, bendir á tvískinnung í viðbrögðum bandarískra stjórnvalda og hægriafla við tvær banvænar skotárásir sem áttu sér stað með fimm ára millibili í Bandaríkjunum.
Í færslu á Facebook ber hún saman málið þar sem Kyle Rittenhouse skaut þrjá menn, þar af tvo þeirra til bana í Kenosha í Wisconsin árið 2020 og nýlegt mál þar sem Alex Pretti, 37 ára gjörgæsluhjúkrunarfræðingur í Minneapolis, var skotinn til bana af Ice-fulltrúum í gær.
Karen rifjar upp að Rittenhouse hafi verið 17 ára gamall þegar hann mætti vopnaður AR-15 riffli á Black Lives Matter-mótmæli í öðru fylki en því sem hann bjó í.
„Rittenhouse var ólögráða, með vopn sem hann hafði ekki leyfi fyrir og kom til annars fylkis til að „verja eignir“ sem voru ekki hans,“ skrifar hún.
Þrátt fyrir það hafi hann skotið þrjá menn sem reyndu að afvopna hann, tveir þeirra létust. Rittenhouse hélt því fram að hann hefði verið að verja sig og var síðar sýknaður af öllum ákærum.
„Trump-stjórnin og þeir sem nú kalla sig hægrimenn gerðu hann að hetju, tákni um réttinn til að bera vopn,“ skrifar Karen.
Í andstæðu við það bendir hún á atvikið í Minneapolis í gær, fimm árum síðar. Þar var Alex Pretti skotinn til bana af alríkisfulltrúum á mótmælum.
„Pretti var að taka upp lögregluaðgerð á myndband og aðstoða konu sem lögreglan hafði hrint,“ segir Karen í færslunni.
Hún leggur áherslu á að Pretti hafi verið með löglega byssu og gilt leyfi til að bera hana, en að myndbönd sýni að hann hafi aldrei notað hana né reynt að gera það.
„Myndbönd sýna að hann notaði hana aldrei og reyndi það aldrei. Pretti lá á jörðinni þegar lögreglan hleypti skotunum af,“ skrifar hún.
Þrátt fyrir það hafi viðbrögð stjórnvalda verið gjörólík þeim sem Rittenhouse naut. Karen bendir á að Stephen Miller, einn helsti hugmyndafræðingur Trump-stjórnarinnar, hafi kallað Pretti „morðingja“ og „hryðjuverkamann“. Þá hafi Donald Trump sjálfur sagt að byssa Pretti hafi verið „hlaðin og tilbúin til notkunar“.
„Eins og það eitt og sér réttlæti aftöku án dóms og laga,“ skrifar Karen og bætir við að Pretti hafi verið „myrtur í aðgerðum sem sagðar eru snúast um öryggi og lög og reglu“.
Færsla Karenar hefur vakið talsverða athygli en yfir tvöhundrað manns hefur líkað við hana og hefur henni verið deilt 14 sinnum, þegar þessi frétt er skrifuð.
