Lögregla hafði í nógu að snúast í dag vegna fjölbreyttra verkefna, meðal annars vegna innbrots, ölvunaraksturs og manns sem reyndist vera í endurkomubanni á Íslandi.

Tilkynnt var um mann sem hafði dvalið í bifreið sinni í nokkra daga á tilteknu bifreiðastæði. Lögregla fór á vettvang og var manninum gert að yfirgefa svæðið, sem hann gerði án frekari vandræða. Þá var einnig tilkynnt um mann í vandræðum og var honum ekið heim til sín af lögreglu.

Einn ökumaður var kærður fyrir að aka án ökuréttinda og annar kærður fyrir akstur sviptur ökuréttindum. Þá var ökumaður handtekinn grunaður um akstur undir áhrifum vímuefna auk þess að hafa ekið án gildra ökuréttinda.

Lögregla var einnig kölluð til vegna manns sem hafði ítrekað hringt dyrabjöllu við íbúðarhús í langan tíma þar sem hann var læstur úti. Við nánari athugun kom í ljós að maðurinn var í endurkomubanni á Íslandi en hafði breytt um nafn. Hann var handtekinn og vistaður í fangaklefa.

Tilkynnt var um innbrot í heimahús og er málið nú til rannsóknar hjá lögreglu. Þá var einn ökumaður kærður fyrir of hraðan akstur.

Einnig var aðili handtekinn eftir að hafa valdið árekstri þegar hann ók rafhlaupahjóli á bifreið. Viðkomandi reyndist vera undir áhrifum áfengis við komu lögreglu á vettvang.